Dimpur, Jymmang:
Ka kam beaiñ kaba ïadei bad ki kam khaïi bad dih drok ka dei kawei na ki jingeh kiba ka jylla Nagaland ka la ïakynduh, khamtam ha ki distrik khappud kiba don markhap bad kiwei kiwei ki jylla. Halor katei, na ka liang u Symbud Myntri Rangbah jong ka jylla – Yanthungo Patton u la pyntip ba ka thaiñ Wokha district, kaba don markhap bad ka jylla Assam ka dei kawei na ki thaiñ ha ka jylla Nagaland kaba don bun eh ki nongdih droks ha ka jylla.
Haba ai jingkren ha ka rynsan General Conference ba 35 jong ka Nyiro Range Students’ Union kaba la pynlong ha Government Middle School, Wokha ha ka Sngi Saitjaiñ kaba la dep, na ka liang u Patton u la kyntu ïa ki samla pule ba ki dei ban long kiba adkar ha ka jingim ka jong ki ha ka imlang sahlang namar ka jingsdang ban kynrei jong ki nongdih droks ha ka thaiñ.
U la ong ba ka jingkynrei ha u droks, ym tang ba ka ktah ïa ka koit ka khiah jong u nongdih droks, hynrei ka ktah matïong ruh ïa ka ïing ka sem bad ka imlang ka sahlang. U la pyntip ba na ka liang ka tnat pulit jong ka jylla ka la shim da ki sienjam kiba kyrpang eh ban tehlakam bad ïakhun pyrshah ïa u droks ha ka jylla.
Na ka liang u Patton u la kyntu ïa ki samla pule ba kin ïasnohkti lem bad ki bor pahara na ka bynta ban ïakhun pyrshah ïa ki jingsniew kiba mih na u droks. Shuh shuh na ka liang u Patton u la kyntu ruh ïa ki samla pule ba kin long kiba adkar ha ka rukom pyndonkam jong ki ïa ki ‘mobile phone’ – ym ba kin pyndonkam bakla ïa ki, hynrei ba kin pyndonkam na ka bynta ki lad wad jingstad bad kiwei kiwei ki lad kiba lah ban kyntiew ïa ka longrynnieng manrynnieng jong ki na ka bynta ka bha ka miat jong kia bad kumjuh ruh na ka bynta ka imlang ka sahlang bad ka jylla hi baroh kawei.
Na ka liang u Patton u la pyntip ruh ba ka sokar jylla ka la shim ruh da ki sienjam kiba kynsai ban pynbiang ïa ki lad jingïarap na ka bynta kito ki samla pule kiba don shisha ïa ka thong ban ïakhun ïa ki eksam UPSC bad NPSC. U la kyntu ïa ki samla pule ba kin dem durut ha ki jingpule ki jong ki bad ba kin kiar na ki kam beaiñ kiba lah ban wanrah ïa ki jingeh ha ka jingim ka jong ki.
Na ka liang u Patton u la ban khia ruh halor ka mat kaba ïadei bad ka jingdonkam ban pynneh pynsah ïa ka ktien ka thylliej bad ïa ki riti ki dustur ba riew spah jong ka jylla namar kitei ki dei ki matti kiba kynsai tam ki ban pynithuh sha ka pyrthei ïa ka jinglong ba kyrpang jong ki paid nongshong shnong ka jylla.
Ha ka jingïalang la wan ruh ban ïashim bynta lem da u Inspector General of Police (IGP) Range, Limasunep Jamir u ba la pyntip ba na ka liang ka tnat pulit ka la shim ïa ki sienjam kiba kyrpang ban ïakhun pyrshah ïa u droks ha ka jylla.
Ha ka jingai jingkren jong u heh pulit u la pyntip ruh ba dang ha ki khyndiat taiew kiba la leit noh, ki a don palat 140 ngut ki runar kiba la shah kem bad shah pynngat hapoh ki kyndon jong ka Narcotic Drugs and Psychotropic Substances (NDPS) Act. U la pyntip ruh ba napdeng kitei ki runar kiba la shah kem, ki kynthup ruh ïa katto katne ki pulit jong ka jylla. Ha ka rynsan la wan ban ïashim bynta da ki samla pule bad ki nongshong shnong na ki 9 tylli ki shnong kiba hap hapoh ka thaiñ Nyiro kynthup ïa ka shnong Nrung Longidang, Longla, Yimkha, Yanthamo, Niroyo, Longsachung, Okhyeyan, Razumphen, bad Satsuphen.
