Tinsukia, Jymmang:
Ki bor pulit jong ka jylla Assam ha ka 8 tarik mynta u bnai ki la pyntip ba u khun jong u runar uba la donkti ha ka kam ban leh be-i-jot bad pynïap ïa kawei ka khynnah rit u la wan ban aiti noh ïalade ha khmat ki bor pulit jong ka jylla hadien ba u la phet rieh na ka kti jong ki pulit naduh ka 3 tarik mynta u bnai.
Dang shen na ka liang ki bor pulit jong ka jylla ki la leit ban kem noh ïa u Anan Tanti bad ïa ka lok jong u na ka daw jong ka jingdonkti jong ki halor ka jingjia shah leh be-i-jot bad pynïap jong kawei ka khynnah rit ha ka thaiñ Margherita. U Anan Tanti u ba dei u runar u ba donkti hakhmat eh ha katei ka kam beaiñ u la shah kem noh ha ki bor pulit jong ka jylla Assam na Namsang tea estate – ka jaka rep slasha kaba don markhap bad ka jylla Arunachal Pradesh.
Ha kawei ka liang, ka lok jong u (Ganga Tanti) ka la shah kem lang ha ki bor pulit jong ka jylla Assam na ka daw jong ka jingdonkti jong ka ban ïalam bakla bad buhrieh ïa ki sabut ha ki kam tohkit halor katei ka kam beaiñ. Kitei ki 2 ngut shilok ki la shah kem hadien ba ki bor pulit jong ka jylla ki la ïoh ban tam ïa ka metïap jong kawei ka khynnah rit na ka thliew ‘septic tank’ kaba don ha ka thaiñ Jayanagar (Margherita sub-division), Tinsukia district jong ka jylla Assam. Hadien ka jingshah kem, na ka liang u Anan Tanti u la ïoh ruh ïa ka jingmynsaw kaba jur hadien ka jingshah siat ha ki pulit ka jylla na ka daw jong ka jingdonkti jong u ban phet jyndat hadien ka jingshah kem.
Kat kum ki jingïoh lum jingtip, ïa u Anan Tanti la shah pynngat hapoh ka section 201, 302, 376 jong ka Indian Penal Code (IPC) bad section 6 jong ka POCSO act.
