Gangtok, Jymmang:
Ki bor sorkar jong ka jylla Sikkim ha ka Sngi Ba-ar mynta ka taiew ki la pyntip ba ki la don 124 ngut ki samla pule kiba na ka jylla kiba la ïoh ban wan phai noh na ka jylla Manipur hadien ka jingmih jong ki jingïakajia bad jingïaumsnam kiba jur kiba la jia naduh ka 3 tarik mynta u bnai.
Kat kum ka jingïathuh jong ki bor sorkar ka Sikkim, ki la pyntip ba ïa kitei ki samla pule la lah wan leit shaw hadien ba ka sorkar jylla ka la pyntreikam da ka “Operation Guraas.” Ki la pyntip ba ïa kitei ki samla pule ha kaba nyngkong la leit shaw da ka liengsuiñ kaba la wan ban pynpoi ha ka nongbah Kolkata bad ha janmiet pat la pynkit ïa ki da ki bus kiba la ïaid lyngba ka nongbah Siliguri bad ha ka step kaba bud pat la leit ban on ïa ki tad haduh ba kin da poi ha nongbah Gangtok bad ha kiwei kiwei ki thaiñ kiba ki shong ki sah.
Kat kum ki jingïoh lum jingtip la ïathuh ba kitei ki samla ki dei kiba pule ha ki jaka pule bapher bapher kiba jong ka jylla Manipur.
Hadien ka jingwanpoi jong kitei ki samla pule ha la ka jong ka jylla, na ka liang ki bahaïing hasem bad ki kmie ki kpa jong kitei ki samla pule ki la ai ïa ka jingkhublei bad ka jingsngewnguh kaba khraw ïa u Myntri Rangbah ka jylla – Prem Singh Tamang bad ïa baroh ki heh sorkar kiba la don bynta ha ka ban leit shaw ïa ki samla pule baroh.
Kum ban shu ïathuh hangne, ki jingïakynat bad ki jingïaumsnam kiba jur bha ki la jia ha ka jylla Manipur naduh ka 3 tarik mynta u bnai. Kitei ki jingïakajia ki la jia hadien ba ki paid riewlum ki la pynlong ïa ka jingïalang bad jingïaïaid paidbah kum ka dak ban pyrshah ïa ka jingdawa jong ka kynhun jaitbynriew Meitei ban ïoh ïa ka kyrdan Scheduled Tribe (ST). Na kitei ki jingïakaji la ïathuh ba ki la don palat 23,000 ngut ki paid nongshong shnong kiba la hap ban mih noh na la ki jong ki ïing ki sem; bad ki la don ruh haduh 54 ngut kiba la duh ei ïa la ki jong ki mynsiem.
