New Delhi, Jylliew:
Ka India Meteorological Department (IMD) ka la ïathuh lypa ba ka jinghap jong u slap kan sa nangjur ha ki bynta ba bun jong ka ri ha kaba la ong ba ka lah ban neh haduh basdang jong u Naitung.
Hashwa kane, ka IMD ka la pynbna ba ka jinghap jong u slap kan long haduh ka 30 tarik, Jylliew, hynrei na jingïai bteng jong ka jinghap jong u slap uba jur ha kiba bun ki bynta jong ka ri, la ithuh ba u slap un dang neh. Hynnin ka sngi ki la don arngut ki briew ha ka jylla Maharashtra kiba la ïap na ka jingshah rong ha ka umbah umsan.
Kane ka tnat ka la ïathuh lypa ruh ba kan sa don ka jinghap jong u slap uba jur ha ryngkat ka jingtied jong u pyrthat ha kiba bun ki bynta jong ka ri haduh ka sngi Saitjaiñ.
Ka jinghap jong u slap uba jur kan sa bteng ha ki jaka ba kham kyndong kiba don ha Himachal Pradesh, Uttarakhand, East Rajasthan, Gujarat, Konkan bad Goa, Maharashtra, Chhattisgarh bad Kerala.
Kumba la sakhi, la ong ba ka jingïai bteng jong ka jinghap u slap ha kiba bun ki distrik jong ka Himachal Pradesh da palat shi taïew ka la wanrah jingeh ïa ki nongshong shnong bad kumjuh ïa ki nongjngoh kai pyrthei naba ki la don ki jingshah khang lynti jong ki surok ha ka jingtwa khyndew, kynthup ha ka surok bah Mandi-Kullu.
Kumba la ïathuh ka tyllong khubor, la ong ba ka jingshah khang lynti jong kane ka surok bah, kumba la ïoh jingtip, la ong ba ka la dei na ka daw jong ka jingshlei um ha Khoti Nala ka jaka kaba don hajan Aut ha Mandi distrik. Sa kawei pat ka jingshlei um kaba la jia ha ka thaiñ Bagipul hajan Prashar Lake ka la pynlong ïa palat 200 ngt ki briew ba kin sahkut lynti hajan Baggi Bridge ka jingkieng kaba don ha ka surok Mandi-Prashar.
“Ka surok bah Mandi-Joginder Nagar Highway ruh ka la khang. Ki riewpaidbah ne ki nongjngohkai pyrthei kiba don ha kine ki surok bah ki la shah bthah ba kim dei ban don ha ki surok kiba don ha trai jong ki jaka ba long lum ïohba jia ki jingtwa khyndew ne ka jingtyllun jong ki maw,” la ong shuh shuh u heh ba dei khmih ïa ki rukom pyntreikam halor kane ka bynta.
