Bhubaneswar, Jylliew:
Ka jingsngewsih bad ka jingsngewsahnud jong ki bahaïing jong kito kiba la ïap na ka daw jong ka jingïatakhuh jong ki rel ha Odisha ha ka 2 tarik, Jylliew ka dang ïai bteng.
Kine ki bahaïing ki la ïai ap bad ïoh shimti ïa ki metïap jong ki baïeid bathoiñ jong ki lajan saw taïew naduh ba la jia kane ka jingjia kaba sngewshyrkei ha kaba ka la shim ïa ka jingim lajan 300 ngut ki briew.
Ka Basanti Devi na ka shnong Bari-Ballia kaba don ha Begusarai distrik jong ka Bihar ka la pynlong jaka sah ha ka Guest House kaba don ha ka jaka ba marjan bad ka AIIMS naduh ki 11 sngi ba la leit.
Kane ka longkmie ka la duhnoh ïa u kurim jong ka u Yogendra Paswan, ha kaba ka la pynpaw ba ka la shem jingeh ban ïai ap ha ka ban ïoh shimti ïa ka met jong u, naba ki bor ba dei khmih ki la pynap na ka bynta ban ïoh ïa ka Report, ka la ïathuh ba ka la ieh ïa lai ngut ki khun hapoh shnong bad ïalam tang ïa arngut ki khun shynrang sha kane ka jaka.
Nalor jong ka, ki la don kumba 35 ngut ki briew kiba sah ha katei ka jaka kiba la ïai ap ban ïoh shimti ïa ka met jong ki bahaïing jong ki bad ki 15 ngut kiwei pat ki la leit phai shala ki shnong naba slem palat ka Report jong ka DNA.
