Ki ’riew pawkhmat ka seng Bharatiya Janata Party (BJP) kum u Bah Alexander Laloo Hek bad u Bah Sanbor Shullai ki khlem shah thung ha ki nongïalam na Delhi ban shimti kum u President bathymmai ka seng ha Meghalaya ha ka jaka jong u Bah Ernest Mawrie, bad la thung pynban da u Rikman Momin na Rilum Garo. U Bah Ernest u la shah jied kum u President ka BJP ha u Kyllalyngkot 2020 bad ka samoi treikam jong u ka dei ban kut mynta u snem hi namar ka dei tang lai snem. Une u rangbah u la ïalam ïa ka BJP ha ka ilekshon MLA 2023, hynrei wat hapdeng kiba bun ki jingkob bad jingpynkhreh, ka BJP ka la ïoh tang arngut ki MLA (Bah Hek bad Bah Sanbor). Naduh ba shimti u Bah Ernest kum u President, ki la mih bun ki jingshah kynthoh na ka liang ki nongïalam ka BJP bad kumjuh ruh na u Myntri Rangbah, Conrad K. Sangma. Ha kajuh ka por, u Bah Ernest u la kawang ktieh ïa ka sorkar u Conrad khamtam ha kaba ïadei bad ki jingkynnoh bamsap. Ki jingkynthoh u Bah Ernest ki la pynbitar shikatdei ïa ka National People’s Party (NPP) haduh ba la poi u pud ba u Conrad u la kam ba kiba bun na ki nongïalam bad dkhot ka BJP ki kwah ban ïohi ba ka BJP kan pynhiar shuki noh ïa u Bah Ernest.
Ngim lah ban len ba u Bah Ernest u la lah ban pynshongshit ïa ka ïew saiñ hima sima ha Meghalaya naduh ba u la shimti kum u President ka BJP. Ki jingkynnoh bamsap bamngem pyrshah ïa ka sorkar Meghalaya Democratic Alliance (MDA) banyngkong ki la pynkhih win ïa ka jylla. Hynrei kaba sngewsih pat ka long ba kita ki jingkynnoh ki la shu kut tang ha ki jingkynnoh namar ka sorkar BJP ha Delhi ka khlem shim satia ïa ki sienjam ban tohkit ïa kita ki jingkynnoh. Lah ban kdew ba ha kine ki snem bad ki bnai, ka BJP ka la kynnoh ba ka sorkar ba la ïalam da u Conrad K. Sangma ka la donkti ha ki kam bamsap bamngem kum ka jingpyntreikam ïa ka Saubhagya Scheme, jingtih bad jingkit dewïong be-aiñ, jingpyndonkam bakla ïa ka pisa ba la phah da ka Sorkar Pdeng sha ka Jaiñtia Hills Autonomous District Council (JHADC) bad Garo Hills Autonomous District Council (GHADC) bad kiwei. Kine baroh ki la shu sah tang ha ki jingkynnoh.
U National Vice President ka BJP, u M Chuba Ao, uba dei ruh u nongpeit nongkhmih ïa ka seng BJP ha Meghalaya, ha ka 3 tarik Nailur, 2022, u la ai ksai ba ka BJP ka lah ban weng noh ïa ka jingkyrshan na ka sorkar Meghalaya Democratic Alliance (MDA) hapoh shi bnai bad ba ka seng ka dang phah lum ïa ki kot ki sla kiba ïadei bad ki jingkynnoh bamsap bamngem pyrshah ïa ka sorkar ba la ïalam da u Conrad K. Sangma bad hadien kata, kin sa wan ki kynhun tohkit kum ka Enforcement Directorate (ED) bad ka Central Bureau of Investigation (CBI) ban tih bniah ïa ki jingshisha. Hadien pat, une u juh u Chuba Ao u la ong ba ka BJP ka dang phah wad ïa ki kot ki sla ha kaba ïadei bad kine ki jingkynnoh bamsap bamngem. Ha ka por ba ïalap ilekshon, u Myntri Korbar Ri, u Amit Shah, haba wan sha Meghalaya, u la kynnoh ba ka Meghalaya ka wan nyngkong eh ha ka Ri ha ki kam bamsap. Hadien ka ilekshon, ka BJP ka la ong pat ba kita ki jingkynnoh ki dei tang ki buit ban khroh ïa ki nongthep ‘vote’! Da ka jingbym leh eiei ïa ki jingkynnoh bamsap kiba ka BJP hi ka la khyllie, ngi shem ba kane ka seng saiñpyrthei ka dei kaba shu kwah pynheh ïew kai bad kam don jingmut kaba khuid ban rat dyngkhong ïa ka bamsap bamngem.
Kiba bun ki la nang pyrkhat ba u Bah Ernest un neh kum u President haduh ka ilekshon MP ka ban long ha u snem ban wan. Hynrei lehse ki nongïalam ka BJP na Delhi ki la don da kawei pat ka jingpyrkhat. Lane ka la don ka jingpyrkhat ba ka BJP kan wanrah da u Bah Hek lane u Bah Sanbor ban long kum u President ka seng. Ïa mynta, ngim pat lah ban ong eiei halor u Rikman namar um pat da paw than ha ka saiñpyrthei wat la u la ju ïakhun ilekshon teng ha kine ki snem kiba la leit noh. Lehse un ïalam hi u Rikman ïa ka seng BJP sha ka ilekshon MP Lok Sabha wat la na kaei kaba la mih na ka ilekshon MLA mynta u snem, ka i jynjar ïa ka BJP ba kan leh bha ha ka ilekshon MP na Shillong bad Tura konstitwensi. Hynrei ban long u nongïalam jong kano kano ka seng khamtam hashwa ka ilekshon, kam dei satia kaba suk. Ka por hi kan sa batai ïa ka lawei jong ka BJP ha kane ka jylla wat la ki dak ki shin kiba paw na ki ilekshon ki pyni ba kiba bun na ki paidbah kim pat i mon ïa kane ka seng ba kan synshar.
