Guwahati, Naiwieng:
Ki la don kumba lai ngut ki briew kiba la shah suba ba ki dei ki nong Bangladesh kiba la shahkem ha Katigorah kaba don ha Cachar, Assam ha ka miet jong ka Sngi U Blei. Kumba la ïathuh ka tyllong khubor, la ong ba ki la don kumba lai ngut ki briew ïa kiba la shah suba donkti ha ka kam beaiñ, ki la shah rah noh ha ka kynhun jong ki nongïarap shnong na ka ïew Kinnakhal hajan ka khappud Indo-Bangla. Kine lai ngut ki la shah kem naba ki nongshong shnong ki la suba sniew halor ka jingleh bad ka rukom ïaid lynti jong ki ha ka miet jong ka Sngi U Blei.
Ha kaba ïadei bad ka jingpynlong ïa ka jingtohkit ïa kine kiba la shah kynnoh, ka kynhun VDP ka la shem ba kine ki briew ki dei ki nong Bangladesh bad ki la rung ha ki bynta jong kane ka ri khlem ki kot ki sla kiba biang. Kine ki lai ngut ki la shah kynnoh ba ki la rung ha Assam halor ka jingthmu ban khaïi tuh ïa ki masi.
Ïa kine kiba la shah kynnoh kham hadien la aiti noh sha ki pulit na ka bynta ban bteng ïa ka jingtohkit. Ka jingtohkit ka dang ïai bteng khnang ban tip bniah ha kano ka rukom kine ki lai ngut ki la ïoh ban rung sha ki bynta jong ka ri India bad ban tip bniah ïohba ki don ki briew kiba la ïarap ha ka ban pynrung tuh ïa ki.
