Guwahati, Naiwieng:
Naduh ba la sdang une u snem, ki pulit jong ka Railway Protection Force (RPF) jong ka North East Frontier Railways (NFR) ki la ïoh ban pyllait ïa 623 ngut ki khynnah rit, kiba kynthup ïa 427 ngut ki khynnah shynrang bad 196 ngut ki khynnah kynthei, ha ka por ba ka la pynlong ïa ki jingleit khynra ha kiba bun ki rel bad ha ki jaka sangeh rel ba bun kiba hap hapoh ka jingpeit jong ka NFR.
Ki la don baroh kumba 16 ngut ki briew kiba la shahkem halor ka jingshah kynnoh jong ki ba ki la donkti ha ki kam khaïi briew ha kine ki por.
U heh pulit u la pyntikna ba ka tnat pulit RPF kan sa ai ka jingïada kaba kyrpang bad ka jingshngaiñ ha kaba ïadei bad ki bynta kiba dei jong ka tnat Railway.
Ki pulit RPF ki la ïakhun khlem shongthait pyrshah ïa ki runar kum shi bynta ban ai ki jingïada na ka bynta ki nongleit jingleit da ki rel, ki dang bteng ban buddien ïa ki runar kiba la donkti ha ki ka khaïi briew bad kumjuh kiba ju ïalam bad kit ïa ki khynnah halor ka jingthmu jong ki ban pyndonkam bakla ïa ki, ban khmih bniah bad ai jingïarap ïa kito kiba leit jingleit tang marwei, ïa ki bym don ki bahaïing ban synranlang ha ka jingleit jingleit jong ki bad kumta ter ter.
Ïa ka jingpyntreikam la pynlong ha kiba bun ki jaka sangeh rel kiba don ha ka thaiñ NFR kum ha New Bongaigaon, New Jalpaiguri, Guwahati, Agartala, Rangiya, Katihar, Dimapur, New Cooch Behar, Alipurduar, Rangapara North, Mariani bad kiwei pat.
