Agartala, Naiwieng:
Ha kaba ïadei bad ka jinglah ban ïakhun pyrshah ïa u drok, ki kynhun ba dei khmih, ki la ïoh ban kurup ïa u Ganja uba 12 kilo na ka kynhun jong ki 7 ngut ki longkmie kiba la pyndonkam ïa la ki khun ban buhrieh ïa kine ki jingdih khnang ban lait na ka jingshah tharai sniew ba ki rah ïa kine ki jingdih pynbuaid. Kane ka jingjia ka la jia ha ka jaka sangeh bos kaba don ha Tripura, kumba la ïathuh da ki pulit ha ka Sngi Ba-ar.
Kine ki briew ki la shahkem ha ka janmiet jong ka lah sngi U Blei hadien ba ki pulit ki ïoh bat bad khmih bniah ïa ki, la pynshisha u Bhanu Pada Chakraborty, uba long u Superintendent of Police jong ka North Tripura distrik. Kum shi bynta ban pyntreikam hadien ba la ïoh jingtip halor kane ka jingdon jong kine ki briew, ka kynhun pulit mar-mar ka la leit sha ka jaka sangeh bus ha Dharmanagar kaba don ha North Tripura distrik. Haba ka kynhun jong ki pulit ka la poi ha kane ka jaka, ki la kerkut ïa kitei ki longkmie, kine baroh ki dei ki nongshong shnong na Bihar, ha ryngkat 6 ngut ki khyllung ba dang rit. Arngut napdeng kine kiba la shahkem la lap ba ki la rah ïa u Yaba Tablet uba la kot sha ka T. 50 lak ha Tripura.
Kine ki longkmie ki la poi ha Tripura da ka rel ha kaba ki la pyrshang ban leit sha Bihar lyngba na surok, la ïathuh u Chakraborty. Ïa kine kiba la shah suba lem bad ki khun jong ki la ïalam sha ka jaka treikam jong ki pulit ka Dharmanagar ha kaba la pynlong ïa ka jingkhmih bniah.
Ha ka por ba la pynlong ïa ka jingkhmih bniah, ka long kaba kyndit bad sngewlyngngoh ban lap ba ïa kine ki song jong ki Ganja ba 12 kilo la buhrieh hapoh ki sohti ba shapoh jong kine ki khyllung. Shuh shuh la ïathuh ba sa saw tylli ki song jong u Ganja ba 5 kilo la lap na ka met jong kine ki khyllung. Kane ka long ka dak ban ithuh ïa ki buit kiba thymmai jong ki nongkhaïi Ganja ne kiwei pat ki jingdih pynbuaid ha kaba la pyndonkam ïa ki khyllung ba dang lui-lui ha ka kam khaïi ïa ki jingdih pynbuaid. Kine ki khyllung kiba la shah pyndonkam bakla ki dei kiba dang don ha ka rta kaba 6 bnai haduh 1 snem shiteng.
Baroh 7 ngut kine ki longkmie ki la shah pynngat hapoh ka kyndon Narcotic Drugs and Psychotropic Substances Act bad ki la shah set na ka bynta ka jingshah tohkit bad shah ïalam hakhmat ka ïingbishar. Namar ba ki dang rit eh, ïa kine ki khyllung la phah noh sha kawei pat ka jaka ban sumar ïa ki.
