Imphal, Naiwieng:
Ka sorkar Manipur ka la ong ba ka jingpyntreikam ïa ka Internet kumba la khmih bniah, la ong ba la buh ha ki bynta jong ka jylla ki bym shah ktah shuh ha ki jingïakynad ne kiwei pat ki jingjia kiba ktah ïa ka imlang-sahlang.
Ha ka jingphah hukum, ka tnat ki kam pohïing jong ka jylla ka la ong ba ka sorkar kan sa pyntreikam noh ïa ki Mobile Tower ha kito ki distrik ki bym shah ktah shuh ha kino kino ki jingjia.
Ïa ka Internet la pyntreikam hateng-hateng ne pynduh syndon ha ki jaka ba la shah ktah na ki jingïakynad ha kaba kane ka la sdang naduh ka 3 tarik, Jymmang haba la jia ka jingïakynad kaba jur kaba la mih hapdeng ki kynhun jait bynriew Meitei bad Kuki.
Ïa ka Broadband Services la pyntreikam ha ka 25 tarik, Naitung. Ki kynhun kiba la mihkhmat ïa ka kynhun jong ki Naga, ki bym don bynta ha ka jingïakhih, ki la pynbor ïa ka sorkar ba ka la dei ban pyntreikam ïa ka Internet ha ki jaka ki bym don shuh ki jingïakynad. Kine ki jaka ki kynthup ïa ka distrik Senapati, Ukhrul bad Chandel, kaba don ki nongshong shnong tang ki Naga.
Ka Manipur High Court ka la hukum ïa ka sorkar jylla ba ka la dei ban pyntreikam ïa ka Internet ha ki distrik ki bym shah ktah na kino kino ki jingïakynad ne kiwei pat ki jingjia kiba ktah ïa ka imlang ka sahlang.
Kane ka hukum ka la long hadien ba ka sorkar jylla ka la nang bteng shuh shuh ha ka ban khang pyntreikam ïa ka Internet haduh ka 8 tarik, Naiwieng.
