Imphal, Naiwieng:
Ki pulit jong ka jylla Manipur ki la lap ïa ar tylli ki metïap jong ki briew ki bym shym la lah ban ithuh, ha kaba kawei ka dei jong u shynrang bad kawei jong ka kynthei na ka thaiñ Kangchup ha ka 8 tarik, Naiwieng, la ïathuh ka tyllong khubor.
Kumba la ïathuh ka tyllong khubor, la ong ba la suba ba kine ki metïap ki lah ban dei ki briew kiba la don bynta ha ka jingkhawai ïathoh shongkurim jong ki jait bynriew Kuki ha kaba la ïoh jingtip ba ki la don ki briew kiba la shah rahbor ha ka thaiñ Kangchup.
Ka tyllong khubor ka la ïathuh shuh shuh ba na ka jingkhmih bniah la lap ba ka met jong ka kynthei ka dei kaba la don dak kuli na ki bynta ka khlieh jong ka ha ka thaiñ kaba ha marpdeng jong ka Tairenpokpi bad Atom Khuman kaba hap hapoh ka jingkhmih jong ki pulit ka Lamsang ha Imphal West.
Ïa kane ka metïap la shim bad rah sha ka jaka buh metïap ha RIMS ha ka 8 tarik. Ha kawei pat ka jingjia, ïa ka metïap jong u shynrang la lap da ki pulit jong ka Iribung ha Takhok Mapl Makha Puruksoubi Loukon Palli ha Imphal East ha katei kajuh ka sngi.
Ka kynhun jong ki pulit ki la rah ïa kane ka met ha ka por 11.30 mynmiet bad leit kit sha ka jaka buh metïap ha JNIMS na ka bynta ban leh ïa kaba donkam. Ka la don ka jingbuh ejahar ha kaba ïadei bad ka jingjia.
