Aizawl, Naiwieng:
Ha ka jingïatreilang ba la pynlong da ki shipai ka tnat Assam Rifles bad ka tnat pulit jong ka Zokhawthar, ïa u kuli Methamphetamine uba don ha ka jingkhia kaba 15.91 kilogram uba la kot sha ka T. 45 klur la ïoh ban kurup noh, la ïathuh ka jingthoh ba la pyllait da ka HQ IGAR (Inspector General Assam Rifles) (East) ha ka sngi U Blei.
Ïa kine ki dawai la ïoh ban kurup na ka thaiñ Zokhawthar ha ka sngi Saitjaiñ. Ïa kine ki song dawai ba la pyndonkam kum u drok ba la ïoh ban kurup la aiti sha ki pulit jong ka Zokhawthar na ka bynta ban leh ïa kaba donkam.
Ka jingïai bteng jong ki kam khaïi tuh ïa u drok bad ka jingpynïaid ïa ka pisa thok ki la long ki dawbah-dawsan kiba la buh jingsngewkhia ïa ka jylla Mizoram bad ïa ka ri hi baroh kawei.
Ki shipai ka tnat Assam Rifles ki la ïai bteng ban trei shitom na ka bynta ban ïakhun pyrshah halor ki kam khaïi beaiñ bad ki la hap ban trei shitom arshah khnang ban lah ban kem ïa ki runar kiba donkam ha kine ki kam khaïi tuh.
Ha ka taïew ba la lah, ka kynhun jong ki shipai Assam Rifles bad ki pulit jong ka Mizoram ki la ïohlad ban kem ïa san ngut ki nong Myanmar bad ïoh ruh ban kurup ïa u drok uba 2.61 kilograms uba la kot sha ka T. 18.3 klur.
