Guwahati, Naiwieng:
Ki pulit jong ka Rangia, hapoh ka jingïalam jong u OC Bhaskar Mallah Patowary, ki la lah ban pyllait im ïa 15 tylli ki masi na kti jong ki nongshoh doh ha ka sngi Saitjaiñ.
Kumba la ïathuh u OC, la ong ba hadien ba la ïoh jingtip halor kane, ka la don ka jingleit khynra ïa ka ïingsah jong uwei u briew ba la tip kyrteng kum u Imam Hussain jong ka Rangia Bongaon, Ward No. 3, ka jaka kaba hap hapoh ka jingkhmih jong ki pulit ka Rangia kaba don ha Kamrup distrik bad ïoh ban kurup ïa kawei ka Renault Triber vehicle (AS01EG 9585) kaba la kit ïa ar tylli ki masi bad kiwei kiwei pat ki tiar pyndonkam, ha kaba ïadei bad ka jingleit shoh doh ïa ki.
Ki pulit ki la kem noh ïa u briew ba la tip kyrteng kum u Nazrul Ali, uba dei u khun jong u Hobibur Rahman jong ka Kalitakuchi Bamunbari, ka jaka kaba hap hapoh ka jingkhmih jong ki pulit ka Hajo.
Ki la don lai ngut ki briew, kiba la phet rieh na katei ka ïing, la ïathuh ki pulit.
Kumba la pynshisha, la ong ba u Imam Hussain u la pyntreikam beaiñ ïa ka jaka shoh doh da kumba katto katne snem napoh ka ïingsah jong u.
Ha ka por ba la don ka jingleit khynra, ki pulit ki la lap sa ïa 13 tylli ki masi na ka kamra ba marjan bad katei ka ïing.
Ki pulit ki la suba ba ïa kine ki masi la shu tuh, ki pulit ki la ïoh ban pyllait lut ïa baroh kitei ki masi na katei ka jaka.
