Aizawl, Naiwieng:
Ki la don kumba 150 ngut ki nong Myanmar kiba la leit sha Mizoram hadien ba ki la phet shnong hadien ba la jia ka jingbthei bom hajan ki bynta jong ka khappud Indo-Myanmar ba la pynhap da ki jet thma jong ki nong Myanmar. Kane ka la wanjia hadien ba ki liengsuiñ thma jong ki nong Myanmar ki la pynhap bom ha ki thaiñ ba marjan bad ka bynta khappud bad ka Mizoram.
Kumba la ïathuh ka tyllong khubor, la ong ba ki la don kumba 17 ngut ki briew kiba la mynsaw na ki jaka sah jong ki poi wir kiba la rung sha Mizoram. Napdeng kiba la mynsaw la don kumba katto katne ngut kiba la shah pynkit sha District Hospital kaba don ha Champhai.
Ka jingleit buhai shnong jong ki briew na Myanmar sha Mizoram ka la long naba ki sheptieng na ka jingpynhap bom jong ki shipai Myanmar ha ka bynta khappud kaba la jia ha ka step jong ka 13 tarik, Naiwieng, kata hynnin ka sngi. Shuh shuh kumba la ïathuh ka tyllong khubor, la ong ba ka jingsiat kaba jur ka dang ïai bteng hapdeng ki shipai Myanmar bad ki shipai ka Chinland Defence Force hajan khappud Indo-Myanmar, ka jaka kaba jngai da kumba 4 kms na Mizoram.
