Agartala, Naiwieng:
Saw sngi hadien ba ka kynhun National Investigation Agency (NIA) ka la pynlong ïa ka jingleit khynra ha ka ri ban ïakhun pyrshah halor ki kam khaïi briew bad ki jingrungtuh jong ki bar ri, ha kaba la ïoh ban kem ïa 25 ngut ki briew, la ïoh ban kem ïa 14 ngut ki nong Bangladesh kiba la rung beaiñ sha kane ka ri, la ïathuh ki heh ba dei khmih.
U heh pulit u la ïathuh ba ki la don 14 ngut ki nong Bangladesh kynthup ïa saw ngut ki longkmie bad saw ngut ki khyllung khynnah ki la shahkem na ka ïing ba ki sah kaba don ha khappud Sabroom ha ka bynta ba shaphang Shathei jong ka Tripura.
“Ki nongshong shnong jong ka Bangladesh ki la rung beaiñ sha ki bynta ba shaphang Shathie jong ka Tripura ha ka sngi Saitjaiñ bad ki la sah ha katei ka ïing jong ki nong India ha ka shnong Baishnabpur kaba hap hapoh ka Sabroom Subdivision. Kine ki nong Bangladesh ki la ong ïa ki pulit ba ki la pyrshang ban leit sha Bengaluru na ka bynta ban leit wad kam. Ngi la wad ïa ki jingtip kiba bniah halor ki jingphla jong ki,” la ong u heh pulit.
Arngut ki nong India, kynthup ïa u trai jong katei ka ïing ba la pynsah ïa kine ki briew, ki la shahkem.
U la ong shuh shuh ba ka kynhun jong ki pulit ka la ïatreilang bad ki shipai Border Security Forces (BSF) na ka bynta ka jingtohkit ha kaba ïadei bad ka jingrung jong kine ki bar ri ha India, ha kaba la ong shuh shuh ba kine kiba la shahkem kin sa shah ïalam hapoh ka ïingbishar.
Ka kynhun NIA ha ryngkat ka jingïatreialng bad ki pulit ka Assam ha ka 8 tarik, Naiwieng, ki la ïoh ban kem ïa 25 ngut ki briew halor ka jingshah kynnoh jong ki ba ki la donkti ha ka kam khaïi briew bad ha ki kam ban rung beaiñ sha ka ri.
