Agartala, Naiwieng:
Ka National Investigation Agency (NIA) ka la kurup noh ïa phra tylli ki jingdon jingem jong arngut ki dkhot jong ka kynhun lehnoh Lashkar-e-Taiba (LeT). Kumba la ïathuh ka khubor ba la pyllait da ki heh jong ka kynhun tohkit, la ong ba ïa ki jingdon jingem la kurup noh da ka ïingbishar kaba kyrpang jong ka NIA ha Jammu hapoh ka jingtreikam jong ka kyndon 33 (1) jong ka UA(P) Act.
“Kine ki jingdon jingem ki dei ki jong u Mohd Shafi Wani, u khun jong u Ghulam Mohi-ud-din Wani, bad u Mohd Tika Khan, uba dei u khun jong u Abdul Ahad Khan, kine baroh arngut ki dei ki nongshong shnong jong ka distrik Pulwama kiba dei ki dkhot jong ka kynhun LeT… Ki la don baroh phra tylli ki jingdon jingem kiba dei jong kine ki arngut kiba la shah kynnoh ïa kiba la shah kurup noh,” la ong ka jingthoh.
U Mohd Shafi Wani bad u Mohd Tika Khan ki la shah mudui pyrshah ha ka NIA ha kaba ïadei bad ka jingpynïap ïa uwei u pulit jong ka Jammu-Kashmir bad pyllait da ka bor ïa u lehnoh Pakistan uba dei jong ka kynhun LeT u Naveed Jatt da kaba siat ïa ka kynhun jong ki pulit. “Da ka jingai hukum jong u heh nongïalam jong ka kynhun LeT uba na Pakistan, ki arngut kiba la shah kynnoh ha ryngkat ka jingïarap jong kiwei pat, ki la ïasuhbuit bad pyllait ïa u Mohd Naveed Jatt ba la tip ruh da ka kyrteng kum u Abu Hanjulla na kti jong ki pulit da kaba siat ïa ka kynhun jong ki pulit ka J&K ha SMHS Hospital Srinagar ha ka por ba u Naveed Jatt u la shah ïalam na ka bynta ban phah khmih bniah ha ka liang ka koit ka khiah jong u.”
Ki jingdon jingem jong u Mohd Tika Khan ki kynthup ïa lai tylli ki jaka, katba ki jingdon jingem jong u Mohd Shafi Wani ki kynthup ïa saw tylli ki jaka bad ka ïingsah. Ka kyndon 33(1) ka la ai jingbit na ka bynta ban kurup ïa ki jingdon jingem kiba dei jong ki briew kiba la shah kynnoh ne shah mudui hapoh ka kyndon ba la shah pynhap hapoh ka Chapter IV ne VI jong ka UA(P)A.
Ha une u snem, ka NIA ka la ïoh ban kurup ïa kumba 46 tylli ki jingdon jingem ha Jammu and Kashmir hapoh ka kyndon 33 (1). Ki jingdon jingem kiba la shah kurup hapoh ka jingtreikam jong ka kyndon 33(1) kin shah pynduh noh wei ba uba la shah kynnoh u la shah rai pynrem na ki kam beaiñ jong u. Haduh mynta ka NIA ka la ïoh ban kurup haduh 96 tylli ki jingdon jingem ha J&K.
