Guwahati, Naiwieng:
Ka Central Bureau of Investigation (CBI) ka la buh da ka jingmudui pyrshah ïa u Deputy Chief Engineer barim jong ka Northeast Frontier (NF) Railways, ha Guwahati, jong ka jylla Assam.
Ka jingmudui ba la buh da ka CBI pyrshah ïa u Deputy Chief Engineer barim jong ka Northeast Frontier (NF) Railways ka ïadei bad ka jingdon jong ka jingkamai ïa ka spah da ka lynti kaba beaiñ.
Ïa ka mukotduma la mudui da ka CBI ha ka 20 tarik, Naiwieng jong u snem 2021 pyrshah ïa uba la shah kynnoh ha kaba ïadei bad ka jingpynshisha ba u la kamai ïa ka spah bymhok.
Shuh shuh la kynnoh ba ha ka por ba la khmih bniah naduh ka 01.01.2013 haduh ka 31.12.2019, uba la shah kynnoh u la lum ïa ka pisa da ka lynti kaba beaiñ kaba la kot sha palat T. 2 klur.
Ka CBI ka la pynlong ïa ka jingleit khynra sha kylleng ki jaka ba don ki jingïadei bad une uba la shah kynnoh kaba la long ha Jorhat bad Guwahati. Ha kane ka por ba la pynlong ïa ka jingleit khynra, la ïoh ban kurup ïa ki kot ki sla kiba ïadei bad ki jingdon jingem ki bym lah ban pynkhih, ki shabi jong ki Locker bad kiwei pat ki tiar kiba long beaiñ.
