Aizawl, Naiwieng:
Ki la don kumba 39 ngut ki shipai Myanmar kiba la shahkem bad shah ïalam sha ka jaka treikam jong ki pulit ka Zokhawthar kaba don ha Mizoram halor ka jingjam beaiñ na ki bynta khappud jong ka Myanmar hadien ba ki la shah kthong ha ki shipai jong ka People’s Defence Force.
Kumba la ïathuh ka tyllong khubor la ong ba ki la don mar 60 ngut ki shipai ha ki jaka treikam jong ki shipai ka Myanmar. Kumba la ïathuh ka tyllong khubor, la ong ba ki shipai jong ka tnat PDF ki la pynïap ïa kiba bun ki shipai ka Myanmar Army ha ki ar tylli ki jaka treikam jong ki.
Wat lada ki shipai ka tnat Myanmar Army ki la pyndonkam da ki liengsuiñ thma bad ki Helicopter, ki shipai PDF ki la tur sha ki ar tylli ki jaka treikam jong ki shipai ka Myanmar kiba don ha ki bynta khappud jong ka Mizoram.
Ka kynhun Young Mizo Association (YMA) ka la khmih bniah na ka bynta ki poiwir na Myanmar bad na ka bynta kito kiba la mynsaw na ki jingïakynad jong ki shipai ha kaba la mih ka jingïasiat naduh ka lah sngi U Blei.
Ka YMA Sub-Headquarters, ha Champhai, ka la noh synñiang da ka snam kumba 42 unit na ka bynta ki briew kiba la mynsaw.
Ha kaba ïadei bad kane, ki la don kumba 21 ngut ki briew kiba la mynsaw, kynthup ki riewpaidbah, ha kaba kine ki la shah pynkit sha Champhai District Hospital; uwei napdeng kine kiba la mynsaw u la khlad noh ha ka lynti ban pynpoi sha ka jaka ai jingsumar na Zokhawthar.
Ki la don kumba phra ngut ki briew kiba la kham mynsaw jur kiba la shah pynkynriah noh sha Aizawl na ka bynta ban pynïoh ki jingsumar ba kham bha na ka bynta jong ki.
San ngut ki la poi lypa ha Aizawl. Sa ïa lai ngut kiwei pat la thmu ban pynkynriah sha kajuh ka jaka ai jingsumar. Kine ki la shah suamr ha Trinity Hospital bad ka Ebenezer Hospital.
