Guwahati, Naiwieng:
Ka jingtih beaiñ ïa ka khyndew ka shyiap na rud jong ka wah Brahmaputra ha Dibrugarh ka buh jingma shibun ïa ka sorbar Dibrugarh.
Na ka jingbym adkar jong ka jingtih ïa ka khyndew bad shyiap na ka thaiñ Poolbagan shaduh Panchali, ka Dibrugarh ka don ha ka jingap jingma.
Kumba la ïathuh ka tyllong khubor, la ong ba ki ‘riewpynkheiñ aiñ ha kaba ïadei bad ki kam tih beaiñ jong ki ïa kine ki mar pohkhyndew narud wah ki la ïaid da ka lynti kaba bakla ban tih ïa ka khyndew ne shyiap na ka wah Brahmaputra hajan Poolbagan shaduh Panchali ha kaba kane ka la ap jingma shibun ïa baroh kawei ka thaiñ.
Kine ki briew ki la shah pynshisha ba ki la pyntrei ïa ka kam jong ki da ka lynti kaba beaiñ ha ryngkat ka jingïatreilang bad ki heh ba dei khmih jong ki khlaw ki btap bad ka jingtih beaiñ ïa u shyiap na ki bynta jong ka Poolbagan bad Panchali kiba don ha Dibrugarh.
“Ka tnat ba dei khmih ïa ki khlaw ki btap kam lah ban leh ei ei ha ka ban pyrshah halor kine ki kam beaiñ. Namar ka jingbteng jong ka jingtih beaiñ ïa ki marpoh khyndew ha kine ki thaiñ ki pud sawdong jong ka Dibrugarh ki ap jingma bha,” la ïathuh ka tyllong khubor.
Kumba la ïoh jingtip, la ong ba ka jingtih ïa ka khyndew ktieh ne shyiap na ki bynta ba marpdeng jong ka Brahmaputra ka la ïai bteng bad kumba la sakhi la ong ba ki la don kumba 15-20 tylli ki lieng ba la ju pyndonkam na ka bynta ban kit ïa kine ki marpoh khyndew kiba la dep tih.
Ha kaba ïadei bad kane, la ong ba ka jingdon bun ki hukum ba la phah da ka National Green Tribunal ha u 2018, ka Ministry of Environment, Forests and Climate Change ha ka sien kaba nyngkong ka la pyllait ïa ki kyndon ha kaba ïadei bad ki jingpyntreikam bad khmih bniah ha kaba ïadei bad ka jingtih beaiñ ïa u shyiap ha ka ri.
