Guwahati, Naiwieng:
Hashwa ban pynlong ïa ka ilekshon Parliamentary, ka Lakhimpur distrik ka la sakhi ïa ka jingmih jingrung jong ki dkhot jong ki seng saiñ pyrthei ha kaba ki la mih na kawei ka seng bad leit ban pynïasoh bad kawei pat.
Ha ka sngi Balang, ka kynhun ba la pynrung seng ka dei kaba hap hapoh ka jingïalam jong ka Bharatiya Janata Yuva Marcha (BJYM) ha Lakhimpur distrik, kaba dei ka seng ïasoh jong ka BJP ha ka jaka treikam jong ka seng.
Ka seng ka la pynshisha da kaba ong ba ki la don kumba 500 ngut ki samla jong ka Lakhimpur distrik, kynthup ki dkhot jong ka TMPK, khamtam kiba na ki 76 tylli ki Legislative Assembly Constituency (LAC), ki la leit ban pynïasoh bad ka seng BJP hapoh katei ka kynhun seng.
Ha kane ka prokram la leit ban ïashim bynta da u President jong ka seng BJYM u Siddhartha Ankur Baruah, u General Secretary u Tridibjyoti Moran, Jila Probhari Biswajit Khaund, u President jong ka BJYM Lakhimpur distrik u Pijush Baruah, u President jong ka seng BJP ha Lakhimpur distrik u Phanidhar Baruah, u MLA ka Lakhimpur u Manab Deka ha ryngkat ki nongïalam jong ka seng.
Kum shi bynta ban pdiang burom ïa kine kiba dang wan pynïasoh bad ka seng, u Phanidhar Baruah bad u Manab Deka ki la ong ba ka jingleit ban pynïasoh jong kine ki samla kan sa nang pynkhlaiñ shuh shuh ïa ka jingtreikam jong ka seng BJP.
