Imphal, Naiwieng:
Ki shipai jong ka tnat Assam Rifles ha ka sngi Ba-ar ki la pyllait noh ïa ki 43 ngut ki shipai jong ka Myanmar kiba la leit ban pyndem hakhmat ki pulit jong ka Mizoram hadien ba ka la mih ka jingïakynad hapdeng ki shipai ka tnat Myanmar Army bad ka CNA/CDF ha khappud Myanmar.
Na ka daw jong ka jingdon jong ka jingïakynad kaba dang shen, ki 39 ngut ki shipai Myanmar ki la leit ban pyndem ha ka janmiet jong ka sngi Saitjaiñ bad ki 4 ngut kiwei pat ki la leit ban pyndem ha ka step jong ka sngi Ba-ar sha ki pulit jong ka Mizoram. Kine ki shipai ki la shah buh ha Zokhawthar Police Station hashwa ban phah ïa ki sha ka shnong Hnahlan.
Kumba la ïathuh, la ong ba hadien kane la aiti ïa ki sha ki shipai jong ka tnat Assam Rifles kumba la bthah da ka Home Ministry. Ki shipai Myanmar ki la long kiba nyngkong ban shah pyllait bad shah phah sha ka shnong Hnahlan kaba don ha Champhai distrik hashwa ban phah pynphai biang ïa ki sha Myanmar da ka Helicopter jong ki shipai ka tnat Indian Air Force. Kumba la ïathuh ka tyllong khubor, la ong ba ïa ki 42 ngut ki shipai Myanmar la aiti sha ka ri jong ki ha ka por 1:00 nohphai sngi jong ka sngi Ba-ar, katba ïa uwei pat dang pynsah namar ba u dang don ki jingmynsaw ha kaba u dang shah sumar ha Champhai District Hospital. Kane ka jingwan tam pud jong kine ki shipai Myanmar sha ki bynta jong ka ri, ka la long naba ki la shah kthong ha ki shipai CNA bad CDF ha ka por ba la don ka jingïakynad hapdeng jong ki ha kaba la mih ruh ka jingïasiat.
