Imphal, Naiwieng:
Ka sorkar Manipur ha ka sngi Balang ka la pynbna ïa ka skhim pyntreikam halor ban shna ïing na ka bynta ki briew ki bym don jaka sah shuh namar ki ïing ki la shah pynjulor bad shah thang ha ka por ba la don ki jingïakynad kiba jur kiba la jia naduh ka 3 tarik, Jymmang, la ïathuh ki heh ba dei khmih.
Ki heh sorkar, ki la ong ba ki la don kumba 4,800 haduh 5,000 tylli ki ïing kumba la ïoh jingtip kiba la shah pynjulor ha ki thaiñ kiba don ha ki jaka them bad jaka lum jong ka Manipur. Kane ka skhim kan treikam tang na ka bynta kito ki ïing kiba la shah pynjulor bad shah thang ha ka por ba don ki jingïakynad ba la mih na ka jingïapher jingmut hapdeng ka kynhun jait bynriew Meitei bad Kuki-Zomi hamar ba la dep ban pynlong ïa ka jingïaid paidbah ba la tip kum ka Tribal Solidarity March ba la pynïaid da ka All Tribal Students Union Manipur (ATSUM), la ïathuh ki heh sorkar.
