Guwahati, Naiwieng:
Ki la don kumba lai ngut ki dkhot ba la ïatreilang bad ka kynhun lehnoh NSCN (K-YA) kiba la shah kynnoh ba ki la rahbor ïa arngut ki riewpaidbah kiba dei ki nongtrei na kawei ka ïingdara kaba don hajan ka wah Tisa kaba don ha ki bynta jong ka surok Kunsa Pongchau ha Longding distrik jong ka Arunachal Pradesh ha ka Sngi Palei.
Kumba la ïathuh ka tyllong khubor, la ong ba kane ka jingshah rahbor jong kine ki briew ka la jia ha ka por 4 baje mynstep jong kane ka sngi. Kat kumba la ïoh jingtip la ong ba ïa kine ki briew la kit sha Kunno Zero Point ha ka trok Bolero Pickup.
Kham hadien ïa kane ka kali la iehnoh ha Kunnu, bad la ong ba kine ki lehnoh ki la thmu ban leit sha khappud Indo-Myanmar. Ïa kine ki nongbylla kiba la shah rahbor la tip kyrteng kum u Shashank Yadav uba na Uttar Pradesh bad u Lemgaw Gowam na ka shnong Nginu. Kine baroh arngut ki dei ki briew kiba la shah pyntreikam hapoh ka jingkhmih jong u Shatrughan Singh uba la pyntrei ïa ka BTRF Project.
