Imphal, Naiwieng:
Ka kynhun nongmihkhmat jong ki 10 tylli ki seng ka liang pyrshah jong ka Manipur hapoh ka jingïalam jong u nongïalam ka Legislature Party jong ka seng Congress bad u Myntri Rangbah barim u Okram Ibobi Singh ha ka sngi Thohdieng u la buh ka jingïalang bad ka Lat jong ka jylla ka Anusuiya Uikey ha Raj Bhavan ha kaba la dawa ba la dei ban wanrah biang ïa ka jingsuk bad ka jingïaid beit ïaid ryntih ha ka jylla. U heh nongïalam jong ka seng Congress ha ryngkat ka jingsynran jong u Symbud Myntri Rangbah barim u Gaikhangam, K Meghachandra, u President jong ka MPCC, u Dr Nimaichand Luwang jong ka JD(U). Ki nongmihkhmat jong ka seng AAP, AIFB, AITC, CPI, CPI(M), NCP, RSP, SS (UBT) ruh ki la donlang ha ka jingïalang ha kane ka sngi.
Kane ka kynhun ka la phah da ka dorkhas sha ka lat ha kaba la dawa ba la dei ban ïaleh katba lah ban pynphai noh ïa ka shongsuk-shongsaiñ bad ban wanrah ïa ka jingïakren ïasuk hapdeng ki ar kynhun jait bynriew khnang ban lah ban weng noh shi syndon ïa ki jingïakynad bad ki jingïapher jingmut. Kane ka kynhun ka la ong ba khlem ka jingtuklar jong ka sorkar kmie, khamtam u Myntri Rangbahduh, ka jingsuk kan ym lah da lei lei ruh ban leit phai sha ka jylla.
