Silchar, Naiwieng:
Ki la don palat 40 ngut ki khynnah kiba la kem pang na ka daw ba ki la ïoh bam ïa ka jingbam kaba long bih ha National Institute of Technology, Silchar. Hadien kane ki la ud shitom bad bun na ki la shah sumar na ka jingpang kpoh, la ïathuh ka tyllong khubor.
Ym slem hadien kane ka jingjia, ka kynhun nongpynïaid skul ka la pynsted ïa ki jingpyntreikam bad phah jingthoh ha kaba la bthah ïa ki khynnah pule ba kim dei ban bam ïa ki jingbam kiba nabar.
“Ha kaba ïadei bad ka jingjia jong ka jingngat bih na ki jingbam jong kiba bun ki jaka sah jong ki khynnah pule ha NIT Silchar, ha kaba ïadei bad kane, ki bor ba dei khmih ki la bthah ïa ki khynnah pule ba kim dei ban bam ïa ki jingbam surok ne na kiwei pat ki jaka kiba nabar,” la ong ka shithi ba la phah da u Dean of Students Welfare.
Kumba la ïathuh ki dkhot jong ka Gymkhana Members, the Institute’s student Union Body, la ong ba ki khynnah pule ki la bam ïa ki Momo na kawei ka dukan die jingbam kaba don habar jong ki phalor ka jaka pule ha NIT ha kaba ki la kem pang.
Kumba la ïathuh ki khynnah pule, la ong ba kiba bun ki la shah sumar ha Jeevan Jyoti Institute of Medical Sciences katba katto katne ngut ki la shah sumar ha Silchar Medical College and Hospital.
Kum shi bynta ban shimkhia halor kane ka jingjia, ki heh jong ka Food Safety and Standards Authority of India (FSSAI) ki la leit sha katei ka jaka ban tohkit bniah halor ka jingkem pang jong ki khynnah pule bad hukum ïa ki jaka die jingbam ba ki la dei ban bud ryntih ïa ki kyndon ba ïadei bad ki jingbam kumno ban long kiba shngaiñ bad kiba bit na ka bynta ki briew ba kin bam. La ïathuh ba kiba bun na kine ki khynnah pule ki la kham koit bad lait na ka jingap jingma halor ka jingktah jong ka jingbam kaba ki la bam.
