Aizawl, Naiwieng:
Ki la don kumba 29 ngut ki shipai Myanmar kiba la pan jaka sah ha Mizoram hadien ba mih ka jingïakynad kaba jur bad ka jingïasiat kaba mar kylliang bad ka kynhun kieng atiar ka People’s Defence Force (PDF) kiba la shah pynphai biang sha ka ri lajong ha ka sngi U Blei, la ong ki heh pulit.
Da kane, ki la don baroh kumba 74 ngut ki heh shipai bad ki shipai jong ka tnat Myanmar, kiba la wan phet sha India hadien ba ki jaka treikam jong ki ki la shah thombor ha ka kynhun kieng atiar ha ka jingïasiat kaba dang shen, ïa kiba la leit ban pynphai biang sha Myanmar, la ong ka heh pulit.
Ki 29 ngut ki shipai jong ka Myanmar ki la leit ïaid lyngba ka Mizoram ha ka 16 tarik, Naiwieng bad leit sha ka jaka treikam jong ki shipai ka tnat shipai Assam Rifles bad ki pulit jong ka jylla hadien ba ki jaka treikam jong ki kiba don ha Tuibual jong ka Chin ha Myanmar, ka jaka kaba jngai kumba katto katne kilometre na khappud Indo-Myanmar ki la shah thombor ha ki dkhot jong ka kynhun Chin National Defence Force (CNDF), kaba dei ka kynhun kieng atiar kiba long shi bynta jong ka kynhun PDF.
“Kine ki shipai ki la shah ïalam da ka liengsuiñ jong ki shipai India sha Moreh, ka jaka sor kaba don ha khappud jong ka Manipur, ha ka sngi U Blei. Na Moreh, ki la ïaid lyngba sha Tamu, ka jaka sor jong ki nong Myanmar kaba jan na Moreh,” la ïathuh ka heh pulit.
Ka la ong ba ka jinghap jong u slap uba jur bad ka jingthut ka suiñ bneng ka la pynsahteng ïa ka jingleit pynphai ïa kine ki shipai ha ka sngi Thohdieng bad ka sngi Saitjaiñ, ha kaba ki la hap ban sah shwa ha India.
