Guwahati, Naiwieng:
Ki nongïalam ba pawkhmat jong ki Karbi kiba kynthup ïa u Jagatsing Engti, Pradip Diphusa bad ka Charishma Rongpipi ki la shah synran ha ki 680 ngut ki nongïalam bad ki nongbud jong ka seng BJP ha Assam ki la leit ban pynïasoh bad ka seng Congress ha ka prokram kaba heh jong ka jingpynrung dkhot kaba la long ha Diphu Club ha Diphu ha ka sngi U Blei.
Napdeng ki dkhot kiba la rung thymmai, la ong ba u Kangther Bey u la long u nongrwai bad u nongïalam ba pawkhmat jong ka Autonomous Movement ha u snem 1986-91.
U nongïalam ba pawkhmat jong ka Autonomous State movement, u Jagatsing Engti u la ïohlong MLA la lai sien na Bokajan konstitwensi ha u snem 1996-2001, 2001-2006 bad 2006-2011.
Ha u snem 2012, u Engti u la shahjied kum u MAC na ka Surupathar MAC konstitwensi sha Karbi Anglong Autonomous Council (KAAC).
Ha u snem 2016, u la leit ban pynïasoh bad ka seng BJP bad u la shahjied kum u MAC na Surupathar konstitwensi bad u la long u nongkhmih jong ka EM na ka bynta ka Higher Education haduh u snem 2022.
Ha ka ilekshon 2022, um shym la ïoh tiket. U Pradip Diphusa u la ïohlong MAC la ar sien na Dhansiri MAC konstitwensi bad u EM ha u snem 2012-2017 hapoh ka jingsynshar jong ka seng Congress. U la leit ban pynïasoh bad ka seng BJP ha ka 23 tarik, Jylliew, 2016, hadien ba la dep ka ilekshon Assembly bad u la shahjied na ka konstitwensi na ka tiket jong ka seng BJP ha ka ilekshon MAC ha u snem 2017.
Pynban um shym la ïoh tiket na ka seng ha ka jingïakhun ïa ka ilekshon Council ha u snem 2022.
Ka Charishma Rongpipi ka dei ka khun jong u EM barim u Prodip Rongpi. Ka la long ka nongpynïaid jong ki karkhana kaba dang khynnah tam bad ka trai jong ka Yellow Tree Cafe, ha Diphu.
Ha kane ka prokram la leit ban ïashim bynta da u President jong ka Karbi Anglong District Congress Committee (KADCC) bad u Myntri barim u Sum Ronghang, u heh nongïalam jong ka seng Congress bad u MP barim u Birensingh Ingti; u MLA barim u Joyram Engleng; ki EM barim kiba kynthup ïa u Ratan Engti bad u Ashok Teron.
