Itanagar, Naiwieng:
Kumba la ïathuh ka tyllong khubor, la ong ba ka la don ka jingjia ïasiat kaba la mih ha ka por bym poi pyrkhat ha ka shnong Injan kaba don ha Changlang distrik ha kaba uwei u shipai jong ka tnat Assam Rifles (AR) bad uwei u khynnah uba dei u nongshong shnong jong kane ka jaka ki la mynsaw.
Kane ka jingjia ka la jia ha ka por ba ka la don ka jingleit khwai dohkha bad kane ka la wanrah ïa ka jingïasiat ba markylliang.
Kumba la ïathuh ka tyllong khubor kumba la ïathuh ki pulit jong ka Changlang, la ong ba ki la don kumba lai ngut ki khynnah shynrang na ka shnong Injan, kiba kynthup ïa u Khamwang Hakhi, Reylom Longri, bad u Lemong Longri kiba la mih na ka bynta ban leit khwai dohkha sha ki bynta jong ka wah Remi ha ka por 4:30 janmiet jong kane ka sngi. Ha ryngkat ka jingrah ïa ka suloi Muzzle-Loading Gun, u Hakhi u la leit lang bad ki paralok jong u kiba la rah ïa ki tiar khwai na ka bynta ban leit khwai dohkha.
Kumba la ïathuh ka tyllong khubor, la ong ba haba la poi hapoh ka wah bad pynkhreh na ka bynta ban khwai dohkha, u Hakhi u la ïohi ba la don kaei re kaei kaba thaba kaba don ha mar pyrshah jong ka jaka khwai u la siat sha katei ka jaka.
Kaba la pynlyngngoh ïa ki, ka long ba na katei ka liang ruh ka la don ka jingpynphai kylla ïa ka jingsiat.
Hadien kane, kine ki lai ngut ki la tip ba ka don ka kynhun jong ki shipai 11th Assam Rifles kaba don ha katei ka thaiñ, bad uwei u shipai ïa uba la tip kyrteng kum u Riflemen Vikash Kumar, u la mynsaw na ka jingshah siat ha ki bynta ka shadem jong u.
Ïa u Kumar la pynkit noh sha Military Hospital na ka bynta ki jingsumar. Na ka jingpynphai kylla ïa ka jingsiat, u Lemong Longri, uwei napdeng kine ki lai ngut ki nongkhwai, u la mynsaw na ka jingdei kuli ha ki bynta ka kjat jong u.
Ïa une la pynkit sha Kharsang Community Health Centre (CHC) na ka bynta ki jingsumar. Kumba la ïathuh ka tyllong khubor, la ong ba ka jingpynphai jong ki shipai ïa ka jingsiat, ka long naba ki pyrkhat ba kiba siat sha ka phang ba don ma ki ki dei ki lehnoh ha katei ka thaiñ.
Kane ka jingjiaka la pynlong ïa ki nongshong shnong ka thaiñ ba kin pynlong da ka jingïakhih pyrshah habar ka jaka treikam jong ki shipai AR ha Kharsang, ha ka por 9:30 mynmit.
Ki pulit ka thaiñ ki la leh ïa kaba donkam ha kaba ïadei bad kane ka jingjia.
