Imphal, Naiwieng:
U shipai jong ka kynhun India Reserve Battalion (IRB) bad uwei u riewpaidbah ki la shah pynïap ha ka jingshah hiar thma ha ki riewkieng atiar ki bym shym la lah ban ithuh ha Kangpokpi distrik jong ka Manipur.
Ïa kine kiba la ïap ba tip kyrteng kum u Henminlen Vaiphei jong ka kynhun IRB na ka shnong Leimakhong Mission Veng bad u Thangminlun Hangsing na ka shnong Hunkho Kuki kaba don ha Imphal West distrik.
Ka jingshah hiar thma ka la jia ha ka jaka kaba don hapdeng ka shnong Haraothel bad Kobsha, ha kaba ka Maruti Gypsy kaba la kit ïa u shipai jong ka IRB bad u nongñiah jong ka ki la shah siat.
Kine baroh arngut, kata u Henminlen Vaiphei bad u Thangminlun Hangsing ki la khlad noh naba jur ki jingmynsaw na ka jingshah thombor.
La pyntreikam shuh shuh khambun ïa ki shipai ha katei ka thaiñ hadien ba la jia kane ka jingshah thombor bad ka jingleit thwet ïa kine ki runar kiba la donkti ha kane ka kam ka dang ïai bteng, la ïathuh ki pulit.
Haduh ba la thoh ïa ka khubor ki pulit kim pat ïoh jingtip ei ei ha kaba ïadei bad ki nongthombor ha ka jingjia bad ki la ong ba ym pat don kano kano ka kynhun pyntriem ka ban kam ba ka la donkti ha ka kjam thombor.
