Guwahati, Naiwieng:
U Eastern Army Commander Lt Gen Rana Pratap Kalita ha ka sngi Ba-ar u la ong ba ki la don palat 6000 tylli ki tiar siat bad pynbthei ïa kiba la shah lute naduh ba la jia ki jingïakynad hapdeng ka kynhun Kuki bad Meitei ha Manipur ha ka 3 tarik, Jymmang.
Na kine ki tiar, 1500 tylli ki tiar siat la ïoh biang katba 4500 tylli kiwei pat ym pat ïoh.
“Ki la don kumba katto katne tylli ki daw ba ïadei bad ki lai tylli ki kynhun kiba kynthup ka kynhun ki Kuki, Meitei bad Naga kiba shong basah ha Manipur ha kaba kane ka la pynlong ba ka jingsuk kam leit phai shuh ha ka jylla wat hadien 6 bnai shiteng naduh ba la sdang ka jingïakynad,” la ong u Lt Gen Kalita, ha ka jingïakren bad ki nongthoh khubor ha Guwahati.
U Kalita u la ong ba baroh ar tylli ki kynhun ki la ïapher jingmut. Wat lada ki jingïakynad ki la jah, ki la don 4000 tylli ki tiar siat ïa kiba la lute na ki pulit bad na kiwei pat ki jaka ha kaba ïa kine haduh mynta ym pat ïoh.
“Ka la don ka jingkhmih bniah ha kaba ïadei bad ki jingkhaïi tuh ïa ki tiar siat bad pynbthei bad kumjuh u drok ha ki bynta jong ka khappud India-Myanmar, wat lada ki la don kiba kum kine ki kam beaiñ hateng-hateng. Naba ki 4000 tylli ki tiar siat ki la jah nga tharai ym don shuh ka jingwanrah tiar siat na shabar,” la ong u Lt Gen Kalita.
“Kumba ka long mynta, na ka liang jong ngi ngi la trei shitom sa tang kumno ban lah ban tehlakam bad ban pynsngewthuh hapdeng kine ki ar kynhun khnang ban lah ban pynphai biang ïa ka jingsuk, ha kaba na ka liang ka synshar-khadar ka la dei ban weng ïa kine ki jingeh kiba la mih hapdeng jong ki,” la ong shuh shuh u Kalita ha ka jingïakren bad ki nongthoh khubor.
