Guwahati, Naiwieng:
Ka sorkar jong ka jylla Assam ka la sdang ban pyntreikam ha kaba ïadei bad ka jingkhang ban die ïa ki masi kiba dang rit bad kumjuh kiba la ïaw ha ka jylla. Hynrei kumba la sakhi, la ong ba ki nongkhaïi ki dang leh ïa ki rukom leh lajong ha kaba ïadei bad ka jingshalan tuh ïa ki masi ha ka jylla hakhmat ki pulit.
Kaba kum kane ka jingjia ka la jia ha Sootea ha ka por ba dang step bha jong ka sngi Ba-ar. Kumba la ïoh jingtip, la ong ba ka kali I-20 kaba don ïa u Registration number AS 02 AH 0403 kaba la mih na Gohpur ka la ngat ha ka jingtakhun kali ha ka surok NH 15 ha ka jingkieng Mornoi hajan ka jaka treikam jong ki pulit kaba don ha Sootea.
Haba ka kynhun jong ki pulit ka Sootea ki la poi ha ka jaka ba la jia ka jingtakhuh kali, u nongñiah jong kane ka kali u la phet na kane ka jaka bad u la ieh ïa ka kali. Haba ka kynhun jong ki pulit ka la khmih bniah hapoh ka kali, ki la lap ïa lai tylli ki masi. Hadien kane, ka kynhun jong ki pulit ka la kit noh ïa kine ki masi sha pyllaw jong ka jaka treikam jong ki pulit bad kurup noh ïa ka kali.
Haba la ïakren bad uwei pat u heh pulit, la ong ba ki nongkhaïi tuh ïa ki masi ki la don la ki buit thymmai ha kaba ïadei bad ka kam khaïi tuh ïa kine ki jingri.
Ka kynhun jong ki runar ka la tuh ïa kine ki masi na ka sem jong ki briew. Kum ban shu pynkynmaw, la ong ba hangne ki jingjia jong ka jingdon ki nongtuh masi bad blang ki la nang kynrei katba nang mih ki sngi ha kaba kane ka la jia ha ka thaiñ Greater Naduar.
