Imphal, Naiwieng:
Ka seng Konsaram Village Authority (KVA) bad ka Konsaram Naga Women Union ki la pynrem jur halor ka jingïai shah thombor jong ki riew paidbah ha ki riew kieng atiar ki bym shym la lah ban ithuh ha Kangpokpi distrik jong ka Manipur kaba la jia ha ka 20 tarik, Naiwieng, 2023, ha kaba ki la don kumba 2 ngut ki briew kiba dei jong ka jait bynriew Kuki-Zo kiba la ïap.
Kum shi bynta ban khanglad ïa ki kam shah pynïap jong ki briew na ka jingïakynad kaba dang bteng ha Manipur, ka kynhun jong ki Naga ka la maham bad byrthen ïa ki kynhun kiba ju hiar thma bad hukum ïa ki ba ki dei ban jngai na ki thaiñ ba don ki Naga.
Shuh shuh na ka liang ki kynhun seng jong ki Naga ki la pynrem jur halor kine ki kam ba shyrkhei ba la leh da ki lehnoh Kuki ha kaba la kynnoh ba ki la ïatreilang bad ki shipai jong ka kynhun 30 Assam Rifles ban thombor pyrshah ïa ki shnong jong ki ha ka 20 tarik, Naiwieng.
