Dibrugarh, Naiwieng:
Uwei u nongïarap jong ka kynhun lehnoh NSCN (K-YA) u la shahkem ha ka kynhun jong ki shipai pahara ha Longding distrik kaba don ha Arunachal Pradesh ha ka Lah Sngi U Blei.
Hadien ba la ïoh jingtip ba la don ki briew jong katei ka kynhun kieng atiar kiba la shang ha katei ka thaiñ, ki shipai jong ka kynhun Khonsa Battalion jong ka tnat Assam Rifles ki la pynlong ïa ka jingleit thwet lehnoh ha ryngkat ka jingtreilang jong ki pulit ka Pongchau na Kunsa ha ka Lah Sngi U Blei bad da ka jingjop ki la ïoh ban kem ïa une u nongïarap jong ka kynhun lehnoh NSCN (K-YA).
Hadien ba ka la don ka jingthwet kaba jur, ïa une u briew la lap na ka ïingsah jong u ha kane hi ka sngi.
Ïa une uba la shahkem la tip kyrteng kum u Longna Pansa, u khun jong u Khonglai Pansa, uba dei u nongshong shnong jong ka Kunnu kaba don ha Longding distrik.
Kumba la ïathuh ki pulit, la ong ba une u briew u la donkti ha ka ban rahbor ïa ki nongtrei jong ka SS Construction Company Pangchao Iron Bridge ha ka 16 tarik, jong une u bnai ba mynta, u Naiwieng.
