Aizawl, Naiwieng:
Ka sorkar Mizoram kan sa khang ha ka ban pyndonkam ïa ki bom pataka na ka bynta ïa baroh ha ka por jong ka jingrakhe ïa ka Khristmas bad ka New Year, la ïathuh ki heh ba dei khmih, ha ka sngi Balang.
U heh sorkar u la ong ba ka la don ka jingïalang kaba la pynlong hapdeng ki heh sorkar bad ki nongïalam jong ki kynhun bapher bapher ïa kaba la pynïaid da ka State Chief Secretary ka Renu Sharma ha ka sngi Ba-ar ha kaba la rai ba ka jingkyrpad ka la dei ban long na ka bynta ki riewpaidbah ba kim dei ban pyndonkam ne ban die ïa ki bom pataka bad ïa kiwei pat ki tiar pynbthei ha ka aïom lehkmen khnang ban pyntikna ban lait na ka jingjaboh jong ka mariang.
Ha kane ka jingïalang la ïakren ruh ha kaba ïadei bad ki jingdonkam na ka bynta ban pyntreikam pyrkhing halor ka kyiad bad kiwei pat ki jingdih pynbuaid ban pyndonkam ha ka aïom lehkmen. Ka Mizoram ka la pynkhreh bha na ka bynta ka jingrakhe lehkmen ïa ka Khristmas bad ka New Year.
Ha ki por ba la leit ruh, ka Mizoram ka la khang ban pyndonkam ïa ki bom pataka, ki sharak ding ba pynher sha suiñ bad kiwei pat ki jingpynbthei, kynthup ïa ki suloi kai, ha ka por ba don ki jingrakhe lehkmen khnang ban lah ban khanglad ïa ka jingjaboh jong ka mariang bad ban wanrah ïa ka jingrakhe kaba khuid ïa ka Khristmas bad ka jingrakhe pyndonburom ïa u snem thymmai. Ïa ka jingpynbthei ïa ki bom pataka la khang ban pyndonkam ruh na ka bynta kiwei pat ki jingrakhe lehniam ne lehkmen jong kiwei pat ki jait niam ha ka jylla.
