Imphal, Naiwieng:
Ha kaba ïadei bad ka jingpyntreikam ban ïakhun pyrshah ïa ka jingrep beaiñ ïa u syntiew Poppy, ka kynhun ba la ïatreilang hapdeng ki shipai ka tnat Assam Rifles, ki pulit bad ka tnat Khlaw ka la pynjulor ïa u syntiew Poppy uba la thung ha ka jaka kaba heh da palat 8 hectare ha ka shnong Sihai bad Khamasom kiba don ha Ukhrul distrik jong ka Manipura.
Da kane, ka kynhun jong ki shipai bad ki pulit ha ryngkat ka jingïatreilang ki la lah ban pynjulor ïa u syntiew Poppy ba la thung beaiñ ha ka distrik haduh palat 101 hectares haduh mynta naduh ba la pynlong ïa ka jingleit khynra pyrshah ïa ki jingthung beaiñ ïa une u jait syntiew ba la ju pyndonkam kum ki drok ïa kaba la sdang naduh ak 8 tarik, Naiwieng, 2023, la ïathuh ki heh pulit.
Katkum ka jingong jong ka jingthoh kaba la wan na ka tnat ïada ri la ong ba ka tnat shipai Assam Rifles hapoh ka jingïatreilang bad ka kynhun u Inspector General jong ka Assam Rifles (South) la lah ban pynjulor ïa u jingdih pynbuaid uba don ha ka jaka rep kaba haduh palat 8 hectares ha Ukhrul distrik ha ka 23 tarik, Naiwieng, 2023.
Kane ka jingpyntreikam ka long shi bynta jong ka “War on Drugs” Campaign, ha kaba la pynlong bad plie da ka sorkar jong ka Manipur na ka bynta ka jingthmu ban lah ban pynduh pyndam lut ïa ka jingthung beaiñ ïa u Poppy ha ka jylla uba ap jingma ïa baroh.
Ka kynhun jong ki shipai bad ki pulit, ki la trei shitom na ka bynta ban pynlong ïa ka jingleit khynra sha ki bynta kiba bun jong ka jylla khnang ban lah ban khanglad ïa ka jingbun jong ki kam khaïi drok.
Ka kynhun ka la rai ban ïai bteng ha kaba ïadei bad ka jingleit khynra sha kylleng ki jaka bad ban ïakhun pyrshah ïa u drok, ïa kane ka jingpyntreikam ki la kynthup lang ban leit pynjulor ïa ki jingthung ba la pyndonkam kum ki jingdih pynbuaid.
