Kohima, Naiwieng:
Ki la don kumba 17 tylli ki shnong kiba hap hapoh ka Pughoboto, Sataka bad Atoizu konstitwensi ha Zunheboto distrik jong ka Nagaland kiba la pynlong ïa ka jingïaid paidbah kaba jai jai ha ka sngi Saitjaiñ na ka bynta ban ïakhih pyrshah halor ka jingsniew palat jong ki surok kiba don ha kine ki thaiñ.
Ka ‘Public Forum’ jong ki 17 tylli ki shnong kiba hap hapoh ka Section-(3) jong ka Showuba-Pangsha (East-West Corridor Road) ki la pynlong ïa ka jingïakhih ha Saptiqa town EAC Headquarter kaba hap hapoh ka Zunheboto distrik ha ka sngi Saitjaiñ.
Kumba la pynshai da ka kynhun, la ong ba ka jingdon jong kiba bun ki surok kiba sniew ka pynpaw ïa ka jingbym pynurlong ïa ki jingkular bad ka jingbym kyntiew ïa ka ïoh ka kot ha ka thaiñ.
Kane ka Forum ka la phah ïa ka dorkhas sha u Symbud Myntri Rangbah u TR Zeliang, uba dei u Myntri ba dei khmih jong ka National Highways and Planning Transformation, lyngba u Deputy Commissioner jong ka Zunheboto.
