Aizawl, Naiwieng:
Ki la don kumba 10 ngut ki MLA riewlum jong ka Manipur, kynthup ki Myntri, kiba la dawa ba la dei ban phiah noh ka jingsynshar na ka bynta ki riewlum ha ka jylla, ki la leit ban ïakynduh ïa u Myntri Rangbah jong ka jylla u Zoramthanga ha Aizawl bad ki la kyrpad ïa ka jingtuklar jong u ban weng ïa ki jngeh ba la mih ha ka jylla Manipur.
Ban jam shakhmat ha kaba ïadei bad ka jingdawa ban ïoh la kajong ka jingsynshar na ka bynta ki riewlum, ki riewlum Kuki-Zo, ha ka sien kaba nyng-kong, kin sa pynlong ïa ki jingïalang paidbah ha ki san tylli ki jylla nalor ka Manipur ha ka 29 tarik, Naiwieng.
U heh jong ka kynhun jong ki riewlum ha Manipur ka Indigenous Tribal Leaders’ Forum;s (ITLF), u Ginza Vualzong ha kine ki khyndiat sngi ba la leit, u la ong ba ïa ka jingïaiaid paidbah kaba heh yn sa pynlong ha ka 29 tarik, Naiwieng kaba dei jong ki riewlum Kuki-Zo yn sa pynlong ha Mizoram, Tripura, Delhi, Karnataka, bad Tamil Nadu, nalor kiba bun ki distrik ha Manipur.
U Zoramthanga, uba long u President jong ka seng kaba bat ïa ka jingsynshar ha ka jylla ka Mizo National Front (MNF), u la ong ba ki MLA riewlum jong ka Manipur kynthup ki Myntri ki la ïakynduh ïa u ha Aizawl ha ka sngi Palei bad kyrpad ïa u ba un ïakren bad ki nongïalam kiba dei ki Naga ha Manipur bad Nagaland ha kaba ïadei bad ki jingïakynad kiba la mih ha ka jylla bamarjan kata ha Manipur.
