Aizawl, Naiwieng:
Ki la don palat 6,000 ngut ki nongshong shnong jong ka Myanmar kiba la phet shnong na ka ri jong ki ha ka por ba don ka jingshah leh donbor ha ki shipai ha u snem 2021 bad kiba la phet shnong dang shen naba la mih ka jingïakynad kaba la jia ha ka nongbah Chin hapdeng ki kynhun kieng atiar jong ki shipai Junta kiba dang pynlong jaka sah ha ka thaiñ Zokhawthar kaba don ha Champhai distrik jong ka Mizoram kum ki nongphet wir.
Ïa kane ka jingïohlum jingkheiñ ba dang shen la pynlong da ki bor sorkar jong ka Champhai distrik ha kaba la pynpaw ba ki la don kumba 6201 ngut ki poiwir kiba dei ki nong Myanmar kiba la sah ha kiba bun ki jaka sah ba shipor bad ha ki ïing jong ki bahaïing jong ki kiba don ha ka shnong Zokhawthar, kaba long ka shnong khappud jong ka Champhai distrik bad kaba la ïasam ïa ki bynta jong u pud u sam bad ka Myanmar.
U James Lalrinchhana, uba long u Deputy Commissioner jong ka Champhai distrik, lyngba ka phone u la ong ba ka jingwad khana samari kaba dang shen ka la pynpaw shai ba nalor ka thaiñ Zokhawthar, kiba bun ki poiwir Myanmar ki la pynlong jaka sah ha kiba bynta ki bynta jong ka distrik. “Kumba ka long haduh ka 20 tarik, Naiwieng jong une u snem, ki la don kumba 6201 ngut ki nongshong shnong jong ka Myanmar ki la pynlong jaka sah tang ha ka thaiñ Zokhawthar.
Napdeng jong ki, “3290 ngut ki la don ha ki jaka ba la pynsah ïa ki bad ha ki jaka sah ba shipor ba la buh kyrpang na ka bynta jong ki bad kiwei pat ki la sah ha ki ïing jong ki bahaïing jong ki kiba don ha Zokhawthar,” la ong u Deputy Commissioner jong ka Champhai distrik.
Shuh shuh katkum ka jingïoh lum jingkheiñ na ka jingdon jong ka khana samari, la ong ba napdeng ki poiwir Myanmar kiba la don ha ki jaka sah ba shipor, ki la don kumba 992 ngut ki longkmie bad 1322 ngut ki dei ki khynnah.
Ha kawei pat ka bynta, ki lajan don 12,000 ngut kiwei pat ki poiwir Myanmar kiba la pynlong jaka sah ha kiwei pat ki bynta jong ka Champhai distrik.
“Haba ïanujor bad ka jingshim jingkheiñ na kiba hashwa, ka jingdon jong ki poiwir ha baroh kawei ka distrik ka la duna bha bad ïa kane yn sa khmih bniah shen,” la ong u James Lalrinchhana.
U la ong shuh shuh ba ki la don kumba katto katne ngut ki briew kiba la leit phai hashwa sha ka ri jong ki.
