Aizawl, Naiwieng:
Ka kynhun jong ki 6 ngut ki nongmihkhmat jong ka NGO Coordination Committee (NGOCC), kaba long ka seng treimon sngewbha ha kaba ïadei bad ki seng jong ki riewpaidbah bad kumjuh jong ki khynnah pule, kumba ka la thmu, ka la leit ïakynduh ïa ka Election Commission hynnin ka sngi, naba ka kynhun ba dei khmih ha ka liang ki kam ilekshon ka la pynkhreh na ka bynta ban ñiew ïa ki vote jong ka ilekshon Assembly ha Mizoram kaba la dep ban pynlong ha ka 7 tarik, Naiwieng ha ka 3 tarik, Nohprah.
Ka tyllong khubor ba la wan na ki heh ba dei khmih jong ka Aizawl ka la ong ba ka kynhun nongmihkhmat jong ka NGOCC, kaba la leit sha Delhi ha ka sngi Palei, ka la leit ïakynduh ïa ka Election Commission kum shi bynta ban phah kylla noh ïa ka tarik na ka bynta ban ñiew ïa ki vote, namar ba ka tarik ba la buh ka hap ha ka sngi U Blei.
Naduh ba la dep ban pynbna ïa ki sngi ban pynlong ïa ka ilekshon ha ki san tylli ki jylla ha ka 9 tarik, Risaw, baroh ki seng saiñ pyrthei, ki kynhun niam, ki NGOs, bad ki kynhun jong ki riewpaidbah ha kane ka jylla ba bun ki riewngeit Khristan kaba long da 87 per cent ki la buh ka jingkyrpad ïa ka ECI ba kan pynkynriah noh ïa ka tarik ban ñiew vote na ka 3 tarik, Nohprah.
Ka jingñiew vote na ka bynta kiwei pat ki jylla kiba kynthup ha Madhya Pradesh, Chhattisgarh, Rajasthan, bad Telangana kan sa long ha katei ka sngi. Ki seng kiba bat ïa ka jingsynshar bad ki seng ka liang pyrshah bad kiba bun ki kynhun seng ha Mizoram ki la ïakhñium bad kim sngewïahap halor kane ka tarik ba la pynbna hashwa, namar kiba bun ki briew ha ka jylla ki dei ki Khristan ha kaba ki la hap ban leit ïingmane ha ka sngi U Blei, ïa ka tarik ban ñiew vote la dei ban pynkynriah noh sha kawei pat ka tarik.
Ha kaba ïadei bad kawei pat ka bynta, hadien ka jingbuh jingkyrpad da ka Mizoram Kohhran Hruaitute Committee (MKHC), ka kynhun jong ki 15 tylli ki kynhun niam, baroh ki jait balang ha Mizoram ki la pynlong da ka jingduwai kaba kyrpang ha ka sngi Saitjaiñ bad ka sngi U Blei, bad ki la dawa na ki bor ba dei khmih ba kin leh ïa kaba donkam.
