Guwahati, Naiwieng:
Ka jingshna ïa ka jingkieng Jorhat-Majuli ka la ïaid shakhmat bad la khmih lynti ban lah pyndep ha u bnai Ïaïong jong u snem 2026, la ong u Myntri Rangbah jong ka Assam u Himanta Biswa Sarma.
Kum ban shu kdew hangne, la ong ba ka jingkieng Jorhat-Majuli kaba la mang ha ka jinglut kaba T. 957 klur ka la long kawei na ki jingtei jong ki Project hapoh ka jingpyntreikam jong ka Assam.
Ha ka jingai jingkren jong u ha ka jingïalang kaba la long ha Majuli, u Himanta Biswa Sarma u la ong, “Nga la leit ban jngoh ïa ka jaka ba la pyntreikam jong ka Kamalabari sha Jorhat ban pynïasoh bad ka jingkieng…katkum ka jingsngewthuh jong nga kane ka jingpyntreikam ban shna ïa ka jingkieng kan sa dep ha u bnai Ïaïong jong u snem 2026.”Shuh shuh, u Myntri Rangbah u la ong ba ha kaba ïadei bad ka jingpyndep ïa kane ka jingkieng, ka jingshna ïa ka surok na baroh arliang ha ka jinglut kaba T. 400 klur ruh kan sa sdang ha u 2024.
Ha kaba ïadei bad ka jingleit jurip bniah, la shem ba kumba 20 per cent ka jingpyntreikam la lah ban pyndep bad hashwa ban wan ka aïom Lyiur yn sa lah ban pyndep da kumba 35 per cent ka jingpyntreikam. “Ngi la hap ban pyndep da kumba 35 per cent ka jingpyntreikam ha ka jingkieng. Ngi donkam ruh ïa kumba 72 tylli ki pung um na ka bynta ka jingkieng. Lait noh ar tylli ki pung, ïa ka jingpyntreikam la pynïaid na kawei ka pung. Ka jingpyntreikam na suiñ ka dang bteng ha baroh arliang. Ngin sa khmih bniah ha kaba ïadei bad kiwei pat ki jingpyntreikam ha kane ka jingkieng hashwa ban wan ka aïom Lyiur ne ka jingwan hap jong u slap. Nga la hukum ïa ka tnat bad ïa ki kontraktor jong ngi ba ki la dei ban pynsted ïa ka jingpyntreikam hashwa ban wan jia ki jingshlei um,” la ong u Sarma.
Ïa ka jingkieng Two-Lane kaba jrong da kumba 6.8-km, kynthup ïa ki surok ban poi sha ka hapdeng ka Majuli (Kamalabari) bad Jorhat (Nimati Ghat), la shna ha ka jinglut kaba T. 925.47 klur.
