Shillong, Jymmang 05
Ka kynhun ïalehkai phutbol ka Meghalaya ha ka Sngi Saitjaiñ ka la pyllait ïa ka kyrteng jong ki ‘rang ïalehkai ban mihkhmat ïa ka Meghalaya sha ka lympung ‘Swami Vivekananda U-20 National Football Championship’ ban pynlong da ka All India Football Federation (AIFF).
Ïa kane ka lympung yn pynlong ha Ramakrishna Mission Ashra-ma kaba ha Narainpur, Chhattisgarh. Ki ‘rang ïalehkai kiba lah ban ïashim bynta ha kane ka lympung ki dei ban long kiba la kha hadien ka 1 tarik u Kyllalyngkot 2005 bad kim dei ban palat ïa ka 1 tarik u Nohprah 2007.
Ki ‘rang ïalehkai ka Meghalaya U-20 Football Team 2024 ki long u Babitlang Wahlang, Meshan Banjop Sumer, Mebanaibok Kharbudnah, Firstbornroy Khongsit, Ronald Kharkongor, Nickyboy Swer, Wanboklang Wahlang, Hubert J Lyngdoh, Shimpor Lyngwar, Da O Hi Paia Rymbai, Chibaitki Pomthied, Wanshuwadame Diengdoh, Samlang Rympei, Freedy Jyrwa, Khainkupar Iawphniaw, Willbeson Jaba, Iashanbok Buhphang bad Richie Kharbani.
Katba ki team official pat ki kynthup ïa u Bah Jeffrey Warlarpih (Head Coach), Damehi Kyndiah (Manager) bad u Bah Baiainehlang Bareh (Physio).
Kane ka kynhun ïalehkai jong Meghalaya kan mih ha ka 7 tarik mynta u bnai ban leit sha Chhattisgarh ban ïashim bynta ha katei ka lympung.
Ka jingthmu ban pynlong ïa kane ka lympung ka wan hadien ba la pynsangeh noh ïa ka lympung ïalehkai U-21 na ka daw jong ka khlam Covid-19. Te kumta kane ka lympung kan long ruh ka jingïarap ïa ki ‘rang ïalehkai ba kin ïoh ban ïashim bynta ha ka Santosh Trophy.
Katkum ka jingpynpaw da katei ka synjuk la ong ba ki la don haduh 32 tylli ki synjuk ïalehkai na ki jylla bapher bapher jong ka ri kiba la pdiang ïa ka jingtyrwa ka AIFF ban wan ïashim bynta ha kane ka lympung ïalehkai U-20. Ïa ki kynhun la phiah ha phra tylli ki group ha kaba ka Chattisgarh kaba ïoh pynlong ïa kane ka lympung ka don ha ka Group-B. Ïa ki jingïalehkai yn pynïalehkai ha la ki jong ki wat bad ka Group-C bad E kin ïoh ban ïalehkai nyng-kong.
Ha kane ka lympung ka Meghalaya ka la don ha ka Group-F kaba kynthup lang ïa ka Rajasthan, Mizoram bad ka Maharashtra.
Ha kane ka lympung ka Meghalaya kan ïalehkai nyngkong ha ka 12 tarik u Jymmang pyrshah ïa ka Mizoram, ia ka Rajasthan ha ka 14 tarik bad ïa ka Maharashtra ha ka 16 tarik.
Kiwei pat ki kynhun kiba don ha ka Group-A ki long ka Chandigarh, Himachal Pradesh, Odisha bad ka Manipur. Katba ka Chattis-garh, Pondicherry, Goa bad ka Delhi kiba don ha ka Group-B. Ha ka Group-C ki long ka Uttar Pradesh, Karnataka, Jharkhand bad ka Ladakh. Group-D ki long ka Kerala, Haryana, Andhra Pradesh bad ka Gujarat. Ha ka Group-E ki long ka West Bengal, Uttarakhand, Punjab bad ka Tamil Nadu. Group-G ki long ka Tripura, Madhya Pradesh, Assam bad ka Arunachal Pradesh. Katba ha ka Group-H ki long ka Sikkim, Telangana, Bihar bad ka Andaman and Nicobar.
