Acapulco, Jymmang:
Ki pulit ka Acapulco ha ka Sngi Balang ki la pyntip ha ka miet Sngi Nyngkong ki la ioh tam haduh 10 tylli ki met-iap na kylleng ki bynta jong ka nongbah Acapulco jong ka Mexico, kaba long ka thaiñ kaba jur bha ki jingiakynad bad jingia umsnam.
Kitei ki met-iap ki kynthup ia 2 tylli jong kynthei bad 4 tylli jong shynrang kiba la ioh tam ha ka miet Sngi Nyngkong bad la ngeit ruh ba ia ka met jong ki la leit ban bret bad pynhap da ka kali.
La ong ba ka la don ka jingïasiat hapoh Emiliano Zapata ha kaba 3 ngut ki la kyllon iap bad kumba 3 ngut kiwei pat ki la mynsaw lang ha katei ka jing-iakynad.
Nalor kane, ki bor pyniaid katei ka thaiñ ki la lap pat ruh sa ia uwei u briew uba la shah siat iap ha ka jaka ba ju smat bha ki ‘riew shangkai pyrthei ban leit rung bad jngoh kai.
Ka nongbah Acapulco ka long ka thaiñ kaba paw bha khamtam ia ki heh spah bad ki longiing ba don ba em kiba ju sngewtynnad ban leit shang kai pyrthei. Hynrei, ka long pat ruh ka nongbah kaba jur bha ha ki kam umsnam bad kaba ju mih jingkulmar na ka por sha ka por bad baroh ki briew ki tip ia katei ka nongbah ba ka long ka bym shngaiñ bad kaba ap jingma bha ha kine ki sngi ba mynta.
Katei ka nongbah ka long ruh ka bynta ba jur bha ki kam khaïi drok napdeng kiwei pat ki nongbah jong katei ka ri Mexico, ha kaba ki jingjia pyniap bad jingiakynad tang hapoh jong u snem 2023 marwei ki la shim ia 1,890 ngut ki mynsiem briew.
La ong ba ki jingjia kum kine, ki la pynlong ia ka Mexico ba kan duh palat 4,50,000 ngut ki briew naduh ba ka sorkar Mexico hapoh ka jingialam u President katei ka ri u Felipe Calderon uba la phah khynra da ki shipai ban tehlakam ia ki kam khaïi drok hapoh ka ri naduh ki snem 2006.
