Dhaka, Nailar:
Ka Bangladesh ka la kyrpad da thikna ba ka India kan pynkloi ban aiti noh ïa ka Myntri Rangbahduh barim ka Sheikh Hasina ha ka jingïakynduh ha ka sngi Nyngkong, 10tarik Naialr 2026, hapdeng u Myntri Rangbahduh ka Bangladesh u Tarique Rahman bad u High Commissioner ka India u Dinesh Trivedi.
Ki jingiakren ha Dhaka ki wan hapdeng ki jingeh kiba la nang jur hadien ka jingiakren bad ki nongthoh khubor da ka nongialam barim ba la shah beh shnong ha New Delhi ha ka 5 tarik u Nailar – ki spah sngi ba ar jong ka jingshah weng kam jong ka. Ha katei ka jingjia, ka Hasina, kaba la shah rai pynrem iap khlem don ha ka iingbishar jong ka ri Bangladesh ha u snem 2025, ka la pynpaw ia ka jingthmu jong ka, ban leit phai biang sha Bangladesh ban “pynphai biang ia ka jingsynshar paidbah”.
Ka ophis jong u Myntri Rangbah duh jong ka Ri Bangladesh (PMO) ka la pynpaw ba, ha ryngkat ka jingpynphai noh ïa ka Hasina, ka Dhaka ka la pynpaw biang ïa ka jingdawa ban pynphai biang ïa ki suba donkti bad ka jingpynïap ïa u nongïalam ka jingïakhih u Shahid Osman Hadi ha u snem 2025.
Wat hapdeng ka jingïakynad, u High Commissioner Trivedi u la batai ïa kane ka jingïalang kum kaba “bha” bad “ba tei,” da kaba pynksan ba ki ar tylli ki jaitbynriew ki ïasam lang ïa ka lawei jong ka jingïatreilang. U la kdew shuh shuh ba ka New Delhi ka la pynjlan ïa ka jingkhot ïa u Myntri Rangbahduh u Rahman ban wan jngoh ïa ka ri India, da kaba ban jur ba watla baroh ar tylli ki ri ki don ïa ki mat kiba dang sahteng, hynrei ki dang ïai bteng ban pynneh ïa ka jingïadei kaba khlaiñ, kaba pynshong nongrim ha ki paidbah. Ka tnad kam bar ri jong ka India ka la pynshai mynshwa ba kam donkti ei ei ha ka jingïakren jong ka Hasina bad ki lad pathai khubor dang shen bad kam kyrshan ïa ki jingkren saiñ pyrthei jong ka.
