Palma, Jymmang:
Katkum ki khubor, la ong ba ka tnum jong ka jaka-bam ‘Restaurant’ kaba don ha ka dewlynnong Mallorca ha ka Sngi Palei ka la khyllem ha kaba 4 ngut ki la khlad bad kumba 20 tam ki la mynsaw ha katei ka jingjia. La ong ba 20 ngut napdeng kitei kiba mynsaw, 12 ngut ki dei kiba shu mynsaw malu-mala bad 9 ngut pat ki la mynsaw jur. Na ka liang ki doktor ki dang ialeh katba lah ban iarap bad ban ai ka jingsumar kaba kloi ha ka por kaba khyndiat eh khnang ban pyllait ia kitei kiba mynsaw jur na ki jingma kiba khraw. Ki bor pyniaid ki iathuh ba katei ka ïing mala ka don ar-mala ha ka thaiñ Playa de Palma sha ka phang Shathie jong ka dew lynnong Mediterranean hapoh ka nongbah Palma de Mallorca. Tang mar ia ioh jingtip hi halor katei ka jingjia, la ong ba ki briew ka tnat pynlip ding ki la leit mar-mar ban pyllait im bad pynkit noh kloi ia kito kiba ngat ha katei ka jingjia bad ia katei ka surok baroh kawei la khang noh shipor da ki pulit.
La ong ba ki briew jong ka kynhun iarap ki dang ialeh hi ban khyllie bad pynkhuid ia ki kynrum-kynram kiba la tap bad sop ia ka madan bad ka bynta ba shapoh jong katei ka jaka bad ban sei ruh ia kito kiba la sahkut hapoh jong katei ka jaka ba twa baroh kawei.
Na ka liang u Myntri Rangbahduh ka Spain, u Pedro sanchez u la phah ia ka kyrwoh sngewlem sha ki bahaiing- bahasem jong kito kiba khlad bad mynsaw ha katei ka jingjia bad ong ruh ba ka long ka jingjia ka bym shym poi pyrkhat ba kat katei ka ïing mala kaba la shna skhem bad kaba la neh baroh shi katta, ha kane ka por pat ka leit twa kynsan khlem da don kino-kino ki daw kiba pynkhih ne pyn synjor ia ka.
Shuh shuh ruh u la ong ba ka sorkar pdeng kan phah ia baroh ki jingdonkam sha ki bor pyniaid katei ka thaiñ khnang ba kin ioh ban pyndep ia ki kam ki jam bad ban leh ia kaba donkam baroh.
Ka Mallorca ka long kawei na ki dewlynnong jong ka Balearic Island hapoh Spain, ha kaba ki um duriaw bad ki rud-nong jong ka ki ju khring shi kat dei ia ki ‘riew shang kai pyrthei bad kaba wan ruh hadien jong ka Catalonia.
La ong ruh ba ki don palat 14 Million ngut ki ‘riew shang kai pyrthei kiba la leit poi sha katei ka dewlynnong tang hapoh u snem 2023. Kane ka long katkum ka jingkheiñ ba la ioh ban lumthup da ka tnat jngoh kai pyrthei jong ka Spain.
