Kyiv, Nailar:
Katkum ki khubor, la ong ba ki drone jong ka Ukraine ki la leit ban thombor ïa ki tiar ïada ‘S-400’ jong ka Russia, kiba la buh kyrpang ban ïada ïa ka iing syiemg jong u President katei ka ri- u Vladimir Putin, hajan ka rud duriaw Black Sea.
Katkum ka jingiathuh jong u heh shipai ka Ukraine, u Major Robert Brovdi, la ong ba ka Ukraine ka la phah thombor da kitei ki drone ba khlaiñ bor jongka, ha kaba, katei ka drone ka la ioh ban leit pynbthei ïa kitei ki kor ïada jong ka Russia, ba la buh khnang ban pyntikna ïa ka jingshngaiñ jong u President katei ka ri.
La iathuh ba kitei ki kor ïada S-400, ki long ka bynta jong ka kynhun pahara kaba kham khlaiñ kaba iada ïa ka jaka sah jong u President katei ka ri. Ki tiar ialeh thma ilektroniks bad la pyntreikam ruh da ki kali pynlip ding kiba ap ha kylleng katei ka jaka sah jong u President. Hynrei watla katta, la ong ba ka Ukraine ka la ioh ban thombor ïa katei ka jaka khlem kano- kano ka jinglap na ka liang ka tnat ïada jong ka Russia ïa katei ka drone kaba la leit rung shaduh u pud- u sam ba katei ka jaka ka don.
Hynrei u Brovdi u la kam ba ïa kane ka kor pynher la pyndonkam biang ban siat ïa ki namding sha ki nongbah jong ka Ukraine, kynthup ïa ki 6 tylli ki namding ba la pynbthei ha ka 8 tarik u Nailar.
Ka kaiphod ka la pynpaw ba ka Russia ka la nang shaniah ha ki system kum ka S-400 na ka bynta ban hiar thma ïa ka Ukraine namar ba ka ïakynduh ïa ka jingduna jong ki Patriot interceptor, kiba la shim ba ki long kiba kongsan bha na ka bynta ban ïada na ki jingshah thombor ha ki namding.
