Tehran, Nailar:
U heh nongialam ka Iran ha ka Sngi Balang, u la iathuh ba kam shym la don kano- kano ka jingiakren hapdeng ka Iran bad ka United States, haba iadei bad ka jing pynjlan ïa ka jingsangeh thma bad katkum ka jingiohi jong ka Iran, la ong ba katei ka jingiakren kam shym la jia mynno- mynno ruh bad kumta kam shym la don ruh ka jing pynjlan kumba la iohsngew ïa ki khubor hamsaïa.
Katei ka jingkren jong utei u heh, ka long hadien ba ka tnat pathai khubor jong ka Turkey, Anadolu, da kaba pynshong nongrim ïa ki tyllong khubor jong ka sorkar Pakistan, ki la mynjur ban pynjlan ïa ka jingsangeh iasiat kaba 60 sngi, katkum ka jingiateh ba shipor jongki, kaba la ïa soi ha u bnai Jylliew.
Bad hadien ka jingïateh kular la pynbna ïa ka “jingpynsangeh noh mardor shi syndon ïa ki kam thombor bad ki jingiakynad na baroh ki liang”, hynrei la pynshai noh kloi, ha kaba u President jong ka US Donald Trump u la ong ba ka la “kut” ha ka 7 tarik u Naitung bad ka tnat kam bar ri jong ka Iran ka la pynbna ba la “pynsangeh” ïa ka hadien shi taiew.
“Ym don jingiakren ban pynjlan por namar, na ka jingpeit jong ka Iran, kam don kano kano ka por kaba la sdang bad kumta ym don ei ei ban pynjlan. Ka America ka la pynkhein ïa ka jingiateh ba shipor hadien 48 kynta ba la iasoi bad ka la weng noh ïa ka hadien katto katne sngi,” la ong ka tyllong khubor ha ka Reuters.
Ha katei ka jingiateh, ka por kaba 60 sngi ka thew ïa ka por kaba lah ban pynjlan hapoh kaba la khmih lynti ba ka Iran bad ka US kin poi sha ka jingiateh kaba khatduh kaba khanglad ïa ka prokram nuclear jong ka Tehran bad ban weng noh ïa ki jingpynjari jong ka U.S.
Ki jingdonkam kiba bun, kum ka jingsangeh thma ha Lebanon, ka jingleit jingwan laitluid ha ka Gulf bad ki jingpyllait ïa ka Iran ban die ïa ka umphniang jong ka, la shim ba ki long kiba donkam shwa ban rung ha ka por jingiakren kaba kham bniah.
“Kawei na ki mat kaba dang ïakren lyngba ki nongpynïasuk ka long ba ka U.S. kan wanphai biang sha ka jingïateh kular ba shipor bad ban batai ïa ka por ban pyntreikam ïa ki jingkular. Kam shym la don satia kano kano ka jingkiew halor kane ka mat,” la bynrap shuh shuh ka tyllong khubor.
