Kyiv, Jylliew:
Katkum ki khubor, la ong ba ka jingleit ther bom ki shipai ka Russia ha ka Sngi Balang sha ka shnong jong u President ka Ukraine- u Volodymyr Zelensky kaba don sha ka phang Shathie jong ka Ukraine, ka la wanrah ia ka jingïap jong 8 ngut ki briew bad kumba 12 ngut pat ki la mynsaw.
La ong ba utei u nongialam ka Ukraine u la pyllait ia katei ka dur-khih ba la ioh ring na ki kor ringdur kiba don ha Kryvyi Rig ha kaba la iohi ia ki briew ka tnat iarap kiba la leit ban pynkhuid bad sei ia kitei kiba sahkut bad mynsaw na katei ka jaka kaba la julor bad twa na ka jingbthei ki bom jong ka Russia ha katei ka sngi.
La ong ba ka jingdon kiba khlad na katei ka jingjia ka la kiew sha ka 8 ngut tad haduh ka miet Sngi Balang ba la ioh ban sei lut ia kiba sahkut ha katei ka jaka bad kumjuh ruh la ong ba kiba mynsaw ruh ki la nang bun bad kiew shaduh ka 21 ngut kynthup ia 2 ngut ki khyllung rit. Nalor kata, la ong ba ki dang don sa 4 ngut kiwei pat kiba dang jah rngai naduh ba katei ka jingjia ka la jia ha ka step jong katei ka Sngi Balang.
Namarkata, u Zelensky lyngba jong katei ka durkhih kaba u la pyllait paidbah ha ka rynsan lad pathai, u la kyrpad ia ki ri marjan kiba dei ruh ki paralok ba ju iatrei lang bad ka Ukraine baroh shi katta ba kin phah jingiarap sha Ukraine da ki tiar iakhun thma kiba ka Ukraine kan lah ban iakhun pyrshah ia ki shipai ka Russia bad ba kan lah ruh ban ai ka jing-iada kaba pura na ka bynta ki paidbah nongshong shnong jongka.
Namar la ong ba ki tiar iakhun thma bad ki tiar iada ban tehlakam ia ki bom ba wan poi na suiñ kiba kham thymmai bad kiba la shna bad pynmih ha kane ka juk ba mynta, kin kham iarap shibun ban tehlakam ia ki bom bad ki ‘namding kiba wan poi nalor suiñ bad kiba la ther da ki shipai ka Russia ban pynjulor bad pyn-um ia ka Ukraine.
Ka Kryvyi Rig, ka dei ka thaiñ kaba la shah thombor bha ha ka Russia ha kine ki 3 snem tam mynta ba ka Russia ka la hiar thma ia ka Ukraine ha kaba ki don kumba 6,35,000 tam ki paidbah nongshong shnong ha katei ka bynta jong ka Ukraine.
