Moscow, Risaw:
U President ka Russia, u Vladimir Putin, ha ka jingiakren bad u Myntri ka Iran- u Masoud Pezeshkian ha ka Sngi Palei, u la kular ba ka Russia kan ialeh katba ka lah ban sei la ka buit- ka bor ban iarap pynkut noh ïa ka jingiakynad hapoh Middle East.
Ngi long kiba kloi ban leh ïa baroh kaba don ha ka bor jong ngi ban noh synñiang ban pynbeit ïa kane ka jinglong jingman,” ong u Putin ha shwa ka jingïalang jong ka thaiñ ha ka ri Central Asia jong ka Turkmenistan, da kaba bynrap ba ka Iran ka la leh “ki jingpyrshang ba shisha ban pynkut noh ïa ka thma” naduh ba ki jinghiar thma jong ka US-Israel ki la sdang ha ka 28 tarik u Rymphang.
U Putin u la kdew ïa ka “jingkylla kaba bha” ha ka jingiadei hapdeng ka Iran bad ka Russia.
Kine ki arngut ki la nang pynskhem ïa ka jingïadei ha ka liang ka kam bad ka kam shipai naduh ba ka Russia ka la sdang ïa ka jinghiar thma jong ka ha Ukraine ha u Rymphang jong u snem 2022, ha kaba ki la nang shaniah iwei ïa iwei pat.
Baroh arngut ki nongialam ki la poi ha ka janmiet jong ka sngi Thohdieng ha shwa ka jingialang jong ki ri laitluid (CIS), ka kynhun jong ki ri Soviet barim, ha ka jaka jngohkai pyrthei jong ka Avaza ha ka duriaw Caspian.
Kine ki president ki la iakynduh khatduh ha shilynter jong ka jingialang jong ka Shanghai Cooperation Organisation ha Kyrgyzstan ha u bnai Naiwieng.
Ka Ukraine bad ki ri sepngi ki la kynnoh ïa ka Iran ba ka ai ïa ka Russia ïa ki liengsuiñ Shahed drone bad ki namding ba lyngkot ban pyndonkam ha ka jingïalap shipai.
Ka Russia ka la shah kynnoh ba ka ai ïa ki jingtip ba la thmu sha ka Iran na ka bynta ki jinghiar thma jong ka ïa ki jingmyntoi jong ka US ha Middle East.
Katei ka jingiakynduh, ka long ha ka por ba ka jingiakren hapdeng ka Iran bad ka America, ka paw ba ka dang sahkut. U Pezeshkian u la ong ha kane ka taiew ba ka jingiakren bad ka Washington ka long kaba khlem jingmut.
