Washington, Risaw:
Ki bor ka aiñ jong ka US, ha kane ka sien, ki la pynbna ba kin sa pyni paidbah ïa ka jingpyniap ïa u nongsiat ha ka jingjia ha Fort Hood, ïa uba la ithuh kum u Nidal Malik Hasan, ïa katei ka rai pyniap bad ka jingpynshitom pyniap, yn sa pyni paidbah khnang ba kiwei ki nongleh kam sniew kin pyrkhat arsien hashwa ba kin leh ïa kano- kano ka kam kaba long pyrshah ïa ka aiñ bad ba kan long ruh ka jingpynkynmaw ïa ki paidbah ba ki kyndon aiñ ba la buh, ki dang treikam bad kin iai treikam kumba ka dei ban long. La ong ba kane kan long ruh ka jingpyniap ba nyngkong eh da katei ka tnat shipai ha kane ka juk ba mynta, hadien 65 snem ba la leh ïa kane ha kitei ki phew snem ba la leit.
Kumta, ki shipai ki la pynbna ba katei ka jingpyniap ïa u, kan long hapoh Fort Hood ha ka 3 tarik u Nohprah hadien ba u Hasan u la dep shah rai pynrem halor ka jingpyniap ïa 13 ngut ki briew bad pynmynsaw ïa 32 ngut kiwei pat ha ka jingshah siat ha ka ktem shipai ha u snem 2009.
U Hegseth, haba kren ha ka tnat pathai khubor jong ka TV ba rim jong ka Real America’s Voice ha ka Sngi Balang, u la ong, “Ngin pyntikna ba ki briew kin ïoh ban peit ïa ka, ba kan long paidbah.” Kumjuh ruh na ka liang jong ki heh ka Pentagon, ki la pynshai ha ka Sngi Balang, ba ïa katei ka jingpynïap, yn sa pyni paidbah bad ba ki jingtip kiba kham bniah, kin sa dang bud.
Ka jingpynpaw na u Hegseth shaphang ka jinglong paidbah jong ka jingpyniap, ka la wanrah shuh shuh ïa ki jingkylli shaphang kumno la pyntreikam ïa ka jingpynshitom iap ha US, khamtam hadien ka jingpynshitom pyniap briew kaba la pulom ïa ka Christa Pike ha Tennessee.
U Hasan u lah ban jied ban pyrshah ïa ka jingpynïap bad ban ujor ïa ka jingujor habeas, ka jingkyrpad aiñ ban bishar bniah ïa ka jinglong aiñ jong ka jingshah set, ha ka ïingbishar jong ki riew paidbah, kaba lah ban pynslem shibun ïa ka jingpynïap, la ong ki riew shemphang.
Ka Deborah Denno, ka riew shemphang halor ka jingpynshitom ïap bad ka nonghikai aiñ ha Fordham University, ka la ong ba ka jingpyni live ïa ka jingpynshitom beiñ ka lah ban pynlong ïa ka rukom treikam “kaba kham shai bha” bad pyntip sha ki paidbah shaphang kiei- kiei baroh kiba ka jingpynshitom ïap ka kynthup. Kita ki dei ki jingmyntoi kiba ka la ong ba kin long kiba myntoi ha ka por ba ka jingpyniap bakla ïa u Pike ka la pynmih ïa ki jingkylli kiba thymmai shaphang ka rukom pyniap ïa ki nongshah mudui na ka bynta ki kam runar jong ki.
“Nga pyrkhat ba ka lah ban long ka jingmut kaba bha namar kan long kaba shai bad ki paidbah kin tip pura ba ka dang iai jia bad treikam haduh kine ki sngi,” ka la ong.
