Shillong, Jylliew 26
Ka lympung ïakop siat suloi ba la tip kum ka 9th Meghalaya State Shooting Championship 2024 ba la pynïaid da ka Shooting Association of Meghalaya (SAM) ka la sdang ha ka Sngi Palei ha Assam Regimental Center, Them Basuk (Happy Valley), Shillong.
Ha kane ka kynti la ïohi ba la nang bun ki nongwan ïashim bynta ha ka jingïakob siat jong ka Pistol bad Rifle.
Ka jingpynlong ïa kane ka lympung ka long kat kum ka jingpriud dak da ka National Rifle Association of India bad la kyrshan lang da ka tnat Directorate of Sports and Youth Affairs jong ka Sorkar Jylla.
Kane ka lympung ka long na ka bynta ki jingïakob kiba 10m rifle & pistol, 25m pistol, 50m rifle open sight & peep sight bad ka 50m pistol na ka bynta ki shynrang bad kynthei ha la ki jong ki kyrdan kata ha kiba hapoh 21 snem (youth) ka rta, 19 snem (junior) bad 16 snem (sub-junior). Ki nongïalehkai kiba la 21 snem shaneng ki ïoh ban ïashim bynta ha ka kyrdan Senior, katba ki nongïashim bynta kiba la 60 snem shaneng ki ïoh ban ïashim bynta ha ka kyrdan Senior Masters bad kiba hapdeng ka 45 haduh 60 snem ki iashim bynta ha ka kyrdan Masters. Kito kiba la 70 snem ki lah ban ïashim bynta ha ka Super Masters. La ailad ruh ïa ki nongïalehkai kiba don jingduna ha ki dkhot met (Deaf Shooters and Para-Shooters) ban ïashim bynta ha kane ka lympung. Ïa kane ka lympung yn pynkut ha ka Sngi U Blei.
